O le vaiaso faaiu o Fepuari na fuafua e usuia ai i Samoa le fono a le komiti aoao a le Ekalesia Aso Fitu Samoa Tutoatasi lea o loo malaga atu ai le tele o usugafono e iai Amerika, Niu Sila, Amerika Samoa, Hawaii faapea Ausetalia ma Samoa, lea na tuuvaa atu ai le tele o au usufono i Samoa.
Na malaga atu ai le taitai matagaluega a Kuiniselani, susuga ia Pr Lagolago ma le faletua ia Puataunofo Levae ma le nofoaalo, faapea foi ona malaga atu ai le faletua manumalo ia Matagi Kitiona Sione ma le nofoafaafeagaiga, Pr Faamolologa & Tamara Fuesaina, Pr Ioane & Judith Maiava, Faafeagaia ia Foa Fanolua & Merry Vaeluaga, faafeagaiga ia Misa Luao & Emo Matai‘a, Susuga i le toeaina o feagai ma news a le lotu, Setiu Iakopo ma le faletua ia Pamata Togipau (teutupe), toeaiina taitai o le matagaluega, Tamala Seumanu Folau Fetoa‘i, toeaina ia Vaetoeifaga Lesā faapea nofoaalo a faafeagaiga ma nisi o loo malaga atu i Samoa.
O le susuga ia Pr Johnny & faletua ia Fitulua Siofele o loo vaaia le faamuli a le matagaluega faatasi ma toeaiina. Ua faamoemoe e lua vaiaso e toesea ai ona toe taliu mai lea i le amataga i fanua i le faaiuga o Fepuari poo le amataga o Mati.
Tau ina ia mamao ni peau lagavale ma ni galutua ae ia sao ma uli le faamoemoe, ina ia toesea a nuu potopoto toe taliu mai a o iai pea aao agalelei o le Atua.
