E lei mamao atu sa faataunuuina ai le sinoti a le Auso poo Tina lava ia, a o lea faato‘ā alo atu le Faasinoti mo le Sinoti tele e pei ona faataunuuina i le Aso Toonai ua tuanai.
E lua vaega o lea Sinoti (1) Sinoti a Usufono (2) Sinoti a le aufaigaluega faifeau ma faletua.
O le tuufaatasiga lea e tapena ai Mau pe faaalia ai ni finagalo e molimoli atu i Samoa i le Koneferenisi tele lea o le a usuia i le masina o Iulai e pei ona silafia e le toatele. Ua lē gata ina tapena ai le itu faaletino ae sili ai le soifua faaleagaga ina ia mausali pea a o lei masii mamao atu.
Sa auai uma Ekalesia e sefulu ma le tasi a le Faasinoti ma o se mafutaga matagofie foi i le auai mai o le Atua i polokalame ma fuafuaga uma o lea aso.
Sa amataina i le manuia toe faaiuina i le fiafia auā na ‘au Ieova i finagalo ma manatu faaalia, o le mafuaaga foi lea na toafimalie ai ma malū le tai ona sa ogatasi le futia ma le umele e faasoa ai ma talanoaina mataupu uma.
Sa taitaia lava le sauniga e le afioga i le Sea ia Rev So‘afa Mulipola, ae fofogaina le lauga o le aso e le susuga i le tausi Matagaluega ia Rev Ioane Tuupo.
Na mae‘a fuafuaga uma ona faia lea o se tausala ma na faapea ona tauaaoina se seleni paia e tusa ma le sefululua afe tala ($12,000).
O le Aao tusitusi o le Faasinoti le susuga i le tausi matagaluega ia Rev Sailiai o loo nafa ma vaega tusitusia o le faasinoti.
E momoli foi le faamalo i lana auauna i le lagolago mai i galuega a le tusitala e ala i ripoti.
O le faaiuga o le masina lenei o Iuni o le a tuuvaa atu ai le auusufono uma i Samoa ma e fuafua e lua vaiaso o le faamoemoe. Tau ina ia alofagia e le Atua le faamoemoe o le Faasinoti Ekalesia Metotisi a Kuiniselani, ia puipui ma leoleo le faigamalaga, toesea a nuu potopoto ma faapaolo Aao agalelei o le Tamā o i le lagi e tetea ai i le fiafia toe feiloai i le manuia.
Manuia tele le usugafono!
