Usuia fono a le siosiomaga o le Pasefika

O le po anapo na faatautaia ai se faatasiga tele ua auai mai ai i Samoa sui o le Siosiomaga a le Pasefika auā le fono faaletausaga lona 24 a le Ofisa o le Siosiomaga o le Pasefika le SPREP. O se fono ua aofai uma ai foi galuega faaauau a lea atumotu ma lea atumotu i le tulaga faigata ua iai nei atumotu eseese ma le tali atu i suiga ogaoga o le tau.
O le fono ananafi na amata ai le feiloaiga lenei a o lei tāloina le fono faaletausaga na faaigoaina o le Fono o le Siosiomaga o le Pasefika (Pacific Environment Forum).
Ua iloilo ai galuega ua faatautaia e lea atunuu ma lea atunuu i le puipui mai o tagata o le itulagi i suiga leaga o le tau.  Ua lē ‘asa lava se tausaga ma ni aafiaga, a lē o mugala, o lologa o vaitafe, o afā ma matagi malolosi ae faapea foi timuga ma le tsunami na molimauina i le 2009.
O Samoa lava ia o loo faaauau foi ana galuega o le tau logologo ma le faalauiloa o tali ua mafai nei ona galulue agai i ai auā se lumanai manuia o le faitau miliona o loo nofoia le tele o motu tumamao ese i totonu o le Vasa Pasefika.
E tele atinae ua agai i ai atunuu laiti ina ia mafai ona ola i se siosiomaga e taumafai e tatali atu i nei suiga leaga o le tau. Ua faamalosia i Samoa lava ia le fausia o taligalu ina ia tau talitali ai le malosi o galu e ta mai i uta ma ‘ati le palapala.
Ua totō vaomatua ina ia tau taofiofi le solo o le eleele a uta aemaise foi i le taimi o tafega. Ua totō foi togatogo ona o le iai lea o se talita i tafega malolosi o le sami.
Ua fai faataitaiga o le suauu e mafai ona gaosi ai malosiaga e pei o le eletise ma faaaogā i le tele o isi galuega e moomia ai, ma taavale. Ua tuuitiitia le faaaogā o le eletise ina ia faaitiitia le suauu taugata o loo aumai e faaola ai lenei malosiaga.
O isi atunuu ua faalauiloa a latou foi galuega aemaise lava i atunuu ua vaaia le magoto lemu ifo lava i le ilititai ma o nisi o loo mumusu e agai ese ma nofoaga na ola a‘e ai ae o le fautuaga lava lea ua ave ia i latou nei, e lē foi i se lelei suiga o le tau ae a talia e tagata i lenei vaitaimi e feagai pea ma faafitauli o le tau, o le galuega lea ua faia i aoaoga ma fonotaga e pei o le fono lenei ua usuia i Apia mo le vaiaso atoa.
O le autū o le fono tele lenei o le Siosiomaga o le Pasefika i Saute mo lenei tausaga o “auala faalenatura e mafai ona tali atu ai i suiga ogaoga o le tau”.
O le tele lava o le taimi o le toe totō o laau ma le faamamalu o faasao i totonu o afioaga ua galulue ai le SPREP, le Matagaluega o le Siosiomaga ma Punaoa faalenatura aemaise o komiti o afioaga ua iai nei faasao. O le toe totōina o togatogo le isi auala faalenatura ma le faamamā o ia nofoaga i aso uma.
Ua taofi le soona susunu o tafunai, ua taofi le faaaogā o vailaau i faatoaga aemaise faatoaga ua tulata i vaitafe ma toe totō le vaomatua auā e taofiofi ai tafega i le lumanai.