Ua teena e le Palemia, susuga Tuilaepa Lupesoliai Sailele Malielegaoi, se tuuaiga a le sui faipule o le Tautua Samoa le afioga Palusalue Faapo II, ua ia faailoa ai i le maea ona lau le iuga a le faamasinoga ua soloia ai le iuga na faia e le Fofoga Fetalai e faapea, o le alii Palemia lava na ia usui le Fofoga Fetalai e tutuli uma latou ae toe foi e faia palota laiti.
O le finagalo o Palusalue e faavae i le lagolago malosi a Tuilaepa i le faaiuga e pei ona saunoa ai i feiloaiga ma tusitala. O le manatu o Palusalue Faapo II ua tatau ona faamavae uma loa le Palemia ma le Fofoga Fetalai ona ua faamamasagia le Palemene o le atunuu i se iuga ua soloia ma talepe e le faamasinoga.
Peitai na tuusao se fesili a le tusitala o lenei nusipepa i le alii Palemia i se feiloaiga ina ua maea ona aumai le faaiuga a le faamasinoga, ma ia matua teena ai le finagalo o le tasi o faipule o Safata. “Na e sese le upu usui, a lea sa ou faasilasilaina atu sa ou fesili i le Fofoga Fetalai e fai sana faaiuga i le mea lea ona o lea e iai le tulafono. E le o se usui la le uiga o le upu lena. O le usui o le mea lena e igoa o lou alu i tua musumusu i le taliga, ae ou te lei musumusu i tai i le maota”.
“O le faalavelave e lei masani tama ia o lea e fou i tai i le maota, toeititi ona matutua lea. E le faia e se taitai ua matua se mea faapena, ae o lea sa ou tulai e fesili aua e iai le tulafono a manao loa le tagata e faatu se pati fou e aofia ai ma independents. A manao loa sui o se isi itu ma independents e faatu se pati, o le mea la e tatau i le faipule e faamaoni ma e le palaai, o le faamavae ma alu i tua e fai le palota laititi”… o le finagalo lea o le alii Palemia.
Na saunoa foi le taitai o le Malo o le faaiuga a le faamasinoga ua aumai e faigata ona faaali i ai sona finagalo seia vagana ua silasila i le faaiuga tusitusia. O lana faamatalaga i le au tusitala na tumutumu atu i lona ofisa mo sona finagalo ina ua maea ona lau le faaiuga, e iai se taimi ona tali mai lea i le mau fesili.
Ae peitai e lei tuumamaina e le sui o Safata lona finauina pea o le tatau ona faamavae le alii Palemia ma le fofoga o le fono ona o lea ua togi i fafo e le faamasinoga le iuga na soloia ai o latou tofi faipule. I le toe tali mai a le Palemia na ia taua ai e pau tagata ua tatau ona faamavae o sui o le Tautua Samoa aua o loo latou silafia lelei e le amiotonu le latou gaioiga o loo fai. O loo augata foi se finagalo o le Palemia o le faaiuga ua aumai e le faamasinoga ia toe foi sui e toaiva o le Tautua Samoa i le palemene ona ua le talafeagai le vaega 10 ma le 15 o le tulafono o faigapalota na faavae ai le iuga e soloia tofi o faipule e toaiva.
