O se tamā e tuusa‘o lava lafoga i totonu o le Maota Fono faitulafono o Samoa. E lē poi faamatalaga i le tele o taimi ma o uiga nei e faagalo gata e soo se tasi lava sa fesootai ma le sui o Gagaemauga Numera Tasi, le Afioga Tuilo‘a Anetelea Tuilo‘a.
Faapea mai lona faletua ia Taupou, ua leva tele ona tauivi le tamā o le aiga ma le gasegase o fatuga‘o lea lava na iu ina faamamā ai lona toto i le falemai faamamā toto i Motootua faapea ai ma le motu tele i Salafai ina ua faatū lea foi auaunaga i Savaii.
Ua lua paeaiga o le Palemene o tulai mai ai le afioga Tuilo‘a o le sui o lona itumalo ma o se taitai e manino le naunau i le faaleleia o atinae o Salafai ma e tele lava foi ina finau ai lava ma lana lava vaega faaupufai.
O faamaisega na faapea ona molimoli e le vaega faaupufai o loo i le foe o le Malo, le Vaega e Puipuia Aiā Tatau a Tagata, le HRPP ina ua maua tala i le vaiaso lava na tea nei ua faamanavaina e le Atua galuega a le auauna.
O le Alii Palemia lava i lana saunoaga faalevaiaso i luga o ofisa faasalalau ma nusipepa lea na momolia faamaisega a le Malo i le tina ia Taupou ma le fanau i le toesea ai o le tamā o le aiga. Na faapea foi ona momoli faamaisega i le itumalo i le toesea ai e le Atua o lana auauna a o loo galue pea o le sui faipule o le itumalo.
O le masina o Mati o le tausaga nei, o le taimi mulimuli lea na vaaia ai le afioga Tuilo‘a i taualumaga o le Palemene.
E tele ni tala a sui o le Palemene aemaise foi o lona lava itumalo ma aiga e mautinoa o le a molimauina ai le soifua galue ma le finau o lenei tamā ma na ta‘ua e le tina o le aiga o se aso o le vaiaso nei e tatau ona faatautaia ai toe sauniga o le afioga Tuilo‘a ae o le a faatali pea se finagalo o le aiga, le fanau aemaise o le itumalo ma le Malo i toe sauniga o le tamā.
Ua avanoa ai foi la ma le nofoa o Gagaemauga Numera Muamua i le tuumalo ai o Tuilo‘a Anitelea ma o le asō e usuia ai le fono faitulafono e talanoaina le tala faatatau autu o le tupe a le atunuu ma atonu o le a faalauiloa mai ai sauniga faalemalo o le alii faipule.
