O le faanaunauga o le alii talavou Samoa, o John Setu, ia tala‘i ma faalauiloa atu lana fesoasoani ina ia soo ai tupulaga talavou uma o le Pasefika, ma ia paia loto o le toatele o ni tupulaga o loo taotaomia i lagona lē mautonu i le olaga, ae meamanū o loo telē se tamaoaiga o ni tomai ma ni taleni o loo ia i latou.
O le Inspire Pasifika, o loo faaigoa ai le polokalame o loo faasavali e le alii o John Setu. O se talavou o loo mātele ina faatino lana fesoasoani i ana talatalaga o loo talanoa faamalosiau ma lauga atu ai i le tupulaga o loo gasolo atu e fia faalogo ma utuvai mai le tamaoaiga o manatu faalaeiau o loo faasola mai e lenei alii talavou.
O le taulaiga tonu lena o le faamoemoe o loo taumafai Setu e lalaga i tupulaga talavou o le Pasefika, ia lafoai lagona o le fiu gofie, le faapalapala, o lagona lē aogā ma manatu e lē mafai ona latou gafatia mea o loo mafaia e isi. I lauga o loo faasoa ai Setu i le tupulaga, o loo ia toe faatepa talavou i le olaga faigata ma le vaofilifili na tauasa mai e nai o tatou mātua ma tuaa a o saili malo mai i lenei atunuu poo isi foi atunuu, o loo saili manuia i ai.
E faamanatu e Setu, le taumafai o nai mātua, e ui ina itiiti pe matuā leai se nanu e silafia, leai se tomai e faatino ai se galuega, ae o le loto o le alofa moni o le mātua, sa natia ai le mafatia ma le olaga pologa, ae taulai le faamoemoe i se isi olaga e sili atu, se olaga o le faaeaina, pe a oo ina fua mai iuga o galuega mamafa sa feagai ai, ina ua iu manuia aoga a le fanau, ma tulai mai i ni o latou nofoaga ua faamanuiaina ai.
O luitau na o loo luitauina ai e Setu le toatele o talavou ua lolofi atu i ana polokalame faatautalaga o loo fai. O le faamanatu a Setu, ia aua ne‘i e faatagaina se siomaga faatauvaa, se siomaga lē lelei ma le taotaomia o loo ola ai isi, e taofia ai lou aapa atu o oe e saili avanoa lelei e tele o loo tatala mai mo oe, ma puepue maua na avanoa uma e liliu i ai lou faatauvaa ma lou vaivai, ina ia e tulai mai o se talavou e te mafaia ona faatino ni mea se tele, ni mea e te mafai ai ona e faasoa atu manuia mo isi.
E iai foi lona faamoemoe e na te fia valaaulia nisi tagata ua iu manuia foi o latou olaga, ona o le ola tauivi, e ui sa amata uma mai lava i ni olaga faatauvaa. E lauga ma faatalanoa e Setu tupulaga i ni auala eseese e mafai ai ona faagaeetia lo latou naunau e aapa atu ma ausia le tele o o latou moemitiga, o tomai ma taleni o loo sapai i o latou lava aao, ae atonu o loo natia pea mai lo latou silafia, i auala e mafai ai ona latou opogi nei taleni ma faaaogā tatau.
Ua fuafua ai nei le Aso Faraile, aso 22 o Mati, 2013, i le 7.30 i le afiafi, mo le faamoemoe o John Setu e faalauiiloa aloaia ai sana polokalame i le faaitu i Sisifo o Aukilani.
O se polokalame o loo faatupeina lava e Setu, faatasi ai ma le lagolagosua a nisi o ana uo o loo latou galulue faatasi i lenei polokalame fesoasoani. E talia fiafia soo se tasi e susū atu i lea aso e faafofoga i talatalaga a lenei alo talavou o le atunuu, ma e leai se totogi o le auai atu i le polokalame o le Inspire Pasifika i lea aso.
E maua Setu pe a vili i lana telefoni 02108413185, auā e fiafia foi e lauga atu i soo se potopotoga lava e moomia lana fesoasoani, e pei o aoga, ni faalapotopotoga a autalavou, o aulotu, poo nisi lava faatasiga e ono faaofi atu ai ma ni upu faamalosiau mo nisi o loo moomia lena fesoasoani.
O le auga lava o le Inspire Pasifika, ina ia ‘faagaeeina le naunau fiafia o tupulaga talavou o le Pasefika, e matuā faaaogā atoatoa le tele o ni tomai ma ni taleni o loo ia i latou.’
Ua iai foi le upega o fesootaiga i le initaneti e mafai ona asiasi i ai ma maimoa i nisi o faatasiga sa lauga ai foi ma faasoa le alii o John Setu i tupulaga talavou. O le upega: www.inspirepasifika.co.nz e te matamata ai ma malamalama atili i le Visiona ma le Misiona o loo momoli mai e le Inspire Pasifika.
