O le unaia o fuafuaga ina ia ausia Sini Autu o le Meleniuma, o se polokalame o loo galulue vaavaalua ai le Malo o Samoa ma Malo Aufaatasi ma o le vaiaso lenei na faatautaia ai se aoaoga faapitoa mo sui o le Palemene i auala e mafai ai e Samoa ona ausia nei sini a o lei oo atu i le tausaga e 2015.
O le sao o faitulafono a le atunuu i le faamalosia o taiala o Sini o le Meleniuma, o le mafuaaga lena o lea aoaoga.
Talu ai o le tele lava o galuega ua faatino agai i le ausia o sini o le Meleniuma ua faatautaia e le malo ma ona ofisa, o le mafuaaga lea ua vaaia ai e Malo Aufaatasi e foliga ua see atu lava i tua se sao o faipule o le Palemene ma ua tele ina lē toe vaaia ai se sao o faipule o le Palemene i nei fuafuaga tetele.
Ae o le latou sao o i latou e sau ai tulafono pasia i totonu o le Maota o lea ua manatu ai i latou na faatautaia le aoaoga lenei, e tatau lava ona malamalama sui o le Palemene i le tāua o le ausia o nei sini e valu i le tausaga e 2015 ma o i latou e unaia le pasia o tulafono i suiga ua faatino nei i Samoa ma isi atunuu o le Pasefika auā lava lenei faamoemoe tele.
O le tatalaina aloaia o lenei faamoemoe na saunoa ai le Afioga i le Palemia, le Susuga Tuilaepa Lupesoliai Sailele Malielegaoi i le saunoaga autu ma na ia tolaulau ai Sini Autu o le Meleniuma lea o loo galulue ai le Malo ina ia ausia e Samoa i le isi lima tausaga o i luma.
8 Sini Autu o loo tulimataia:
E aofia ai le tatau ona faaitiitia le mativa ma le fia aai i totonu o Samoa.
Ia maua e fanau uma le avanoa e aooga ai i aoga amata poo aoga tulaga lua ma o le a mafai ona ausia lea tulaga e ala i le uunaia o mātua e faaaooga fanau.
Uunaia le aia tutusa o alii ma tamaitai i avanoa uma ma o loo iai le faamoemoe o le Malo ia oo atu i le tausaga e 2015, ua tutusa uma avanoa e maua e alii ma tamaitai e le gata i galuega ae o loo tagai foi le Malo i le ono faia o se tulafono e faamalosia ai le tatau lea ona maualuga le fuainumera o tamaitai i totonu o le Palemene.
O nisi o Sini Autu o le Meleniuma e aofia ai le tuuitiitia o le fuainumera o fanauiti e maliliu i lalo ifo o le tai lima tausaga le matutua, ma o lea faamoemoe o loo uunaia ai e le Malo le faamalosia o le faia o tuipuipui mo fanauiti e tauala atu i le Matagaluega o le Soifua Maloloina.
O lea foi fuafuaga ua faataatia ai e le Malo le tatau lea ona siitia le tulaga o togafitiga e puipuia ai soifua o tina maitaga ma ia faaitiitia foi le fuainumera o tina maitaga e maumau o latou soifua i taimi o feagai ma maitaga.
O loo ave foi le faamamafa a le Malo i le faasagatau atu lea e tineia le faamai oti po o le HIV/AIDS e ala i siitia o le tulaga tau i togafitiga aemaise o le itu tau i puipuiga o tagatanuu o Samoa mai le ono aafia i siama o lenei faamai matautia e ala i le tutu faatasi o tagata uma e tetee atu i lea faamai oti.
O se tasi o sini autu o lea polokalame o le faamalosia lea o Samoa ina ia faaauau pea puipuiga o le tatou siosiomaga. Na taua e le Afioga i le alii Palemia o le vaitau lenei ua tele faafitauli ua feagai nei ma le lalolagi aemaise lava i Samoa i suiga ogaoga o le tau ma ua ia fautuaina ai le atunuu ina ia tuuitiitia le soona taina i lalo o laau po o le vaomatua ona ua tau leai ai se suavai maua.
O lea sini na ia ta‘ua ai o le itu e foia ai lea faafitauli o le toe faamalosia lea o tagata ina ia toe toto laau ma faasao le vaomatua ona e na o le pau lea o le auala e toe tapue ma fesoasoani e maua mai ai le suavai aemaise o le tele o nisi o oa faalenatura tatou te maua mai ai.
Ma le sini mulimuli lea e valu i ai sini o le Meleniuma, o le faatumau lea o faiga paaga a Samoa ma atunuu o loo agalelei mai i le tauatinaeina o le tamaoaiga o le atunuu.
O lea faiga na ta‘ua ai e le Palemia e matala mai ai avanoa mo maketi auā oloa a Samoa e faatau atu i atunuu tetele o le lalolagi faatasi ai ma le tuuitiitia o le mativa ma le lē tagolima i totonu o si o tatou atunuu.