O nei lava manatu ua mapuna mai i lenei vaitau o le soifuaga, o vaega ia sa soifua ai si o tatou atunuu i totonu o aiga, ekalesia, aemaise le atunuu atoa.
O loo tele foi ni a tatou muagagana e faatatau i ai. “O le pulupululima faatasi e māmā ai se avega.” “O le to‘ese a nuu potopoto”. Ma le tele o mau alagaupu, e faatatau lava i le galulue faatasi.
O le manatu lea o le Ofisa o Aoga i le taimi nei, a o saili fofo mo le siitia o le tulaga o aoaoga a alo ma fanau Pasefika i Aotearoa. Ua manaomia le faipaaga ma le vavalalata o mafutaga mafanafana, ina ia femalamalamaai i le faatinoina o fuafuaga, ina ia saunia ni polokalame anagata ma le talafeagai mo alo ma fanau.
O le tulaga o loo iai nei, a faaletonu loa le taumafai o nai fanau i totonu o aoga, ona tulei loa lea i le aiga, ona o le alu o taimi i le lotu, o le lē nonofo i le fale e vaai fanau, o le leai o ni tusi faitau, ma isi lava anoano o faaupuga.
Peitai, o se faaiuga o se suesuega sa faatinoina i Aukilani i Saute (2001) a le Iunivesite a Aukilani, na matauina ai, e lē o fanau ma aiga, ae o le lē fuafuaina tatau o polokalame a aoga, ma le lē talafeagai o polokalame i totonu o potu aoga.
O le autu o lea suesuega na faaigoaina, “Shifting the Focus” – “Sui le Faamamafa”.
O le tele o suesuega ua lagolagoina lea finagalo, ua amata ai foi ona sui le faamamafa a le Ofisa o Aoga, ma ua manaomia ai faigapaaga, ina ia galulue faatasi e fausia ma fuafuaina ni polokalame talafeagai mo fanau i aoga i Aotearoa.
O le manatu, afai e malamalama Komiti Faafoe, Puleaoga, Pulega ma Faiaoga, i manaoga o mātua ma fanau, faapea ma saofaiga o loo auai ai, malamalama ma mātua, aiga ma saofaiga eseese i manaoga a le aoga, e mafai ona galulue faatasi e fausia ma fuafuaina ni polokalame talafeagai e faamalieina manaoga o tagata uma ma faamanuiaina ai ma le taumafai o fanau.
O le taimi nei, o loo tele lava ona fuafua e le aoga ma faiaoga ma le manatu, o mea ia e tatau ona aoao ai fanau. Tuu uma iloa ma vaega o loo faatāua e mātua, ae omai sei aoao i mea nei ou te manatu e tatau mo outou.
E leai se femalamalamaai, leai se fia iloa poo le a tonu se vaega e tatau ona amata ai le fuafuaina o se polokalame ina ia talafeagai ma manaoga, ae fau toatasi, pe fetaui pe le talafeagai, ae faataunuu pea.
O le iuga, o le toatele o nai alo ma fanau e le ausia matatia fuafuaina ona ave loa lea i ai o le faamamafa. Ae fai mai le suesuega, sui le faamamafa.
Ua matuā manaomia le vavalalata o aoga ma ekalesia ia latou fuafuaga ina ia galulue faatasi mo se manuia o fanau, aemaise lava i le literati (faitautusi ma le tusitusi, ma le matematika) ma le numerate o loo matuā faamamafaina i aoga.
O loo faatinoina nei vaega uma i polokalame a Aoga Aso Sa, Aoga a Faifeau ma Autalavou, ae a galulue soosootauau ma aoga, ona matuā sili lea ona mautu ma galulue felagolagomai ai, mo le lelei o alo ma fanau mo a taeao.
O nai manatu vaivai ia e faamanatu ai o tatou tiute auā se lumanai manuia o fanau. O loo tusia lava ma le agaga maualalo mo lou silafia Samoa.
Ae afai ua avea ma ‘ulu faatoligaoa i finagalo, ma manunu ai le to‘au, faamagalo le auauna, ona o le naunau lava ina ia maua e alo ma fanau ni avanoa lelei, auā ni o latou lumanai manuia. Manuia tele le feagai ai ma tiute o lenei vaiaso.
