O le umi o le soifua o le tagata, o le lelei ma le paleni o lana taumafa i aso taitasi ma toaga e fai lana faamalositino. O ni vaega tāua ia na saunoa i ai le susuga i le fomai, le Consultant Surgeon, Dr Poni Ponifasio i le faatāua o le lelei ma paleni o taumafa e faaaogāina e o tatou tagata. O le Aso Gafua, 24 Fepuari na faataunuuina ai se semina e leai se totogi i le faaitu i Sisifo o Aukilani mo tagata Samoa i le Nutrition my Life i Glen Eden. Na amata i le tatalo na saunia e le tamā faifeau malolo manumalo mai le PIC le susuga ia Solomona Uitine ma faagasolo ai loa le polokalame, e tele ni vaega lelei o le soifua maloloina o le tagata na afea i le saunoaga a le fomai, aemaise o le puipuia o tatou mai i ma‘i o le tino, e pei o le toto mauauluga ma le suka.
Na ta‘ua e le fomai ia Dr Ponifasio, o le tele o taumafa i aso la sa leai ni ma‘i e aafia ai le soifua o le tagata ona sa leai ni vailaau e faaaogāina ai, a o aso nei ua mauagofie tatou i ma‘i eseese ona ua faaaogā vailaaau i aano o manufasi ina ia vave ona lapopoa ai, aemaise o le tele o fualaau ‘aina mai isi o atunuu ua faaaogā ai foi vailaau e puipui ai le tino ina ia umi ona lelei ae lē tāua mo le soifua maloloina o le tagata. O le tasi itu tāua, o le aua ne‘i soona faaaogā tele e tatou masima, suka, ma meaai e tele ai le ga‘o e ono maua ai le tagata i gasegase. Sa faamalosiau le fomai e tatau i le tagata ona fai lana filifiliga tonu ma le sa‘o i meaai e tatau ona ‘ai ai, ma toaga e inu le vai i aso taitasi ma taumafai ia maua le 80% o meaai paleni, ma le 20% o le faamalositino, ma lona naunautaiga e tatau i tagata Samoa ona saili nofoaga o loo iai taumafa paleni latou te faaaogāina mo le soifua maloloina lelei.
O se polokalame na faatāua tele i le mamalu o le atunuu ona ua latou malamalama ai i ituaiga taumafa e tatau ona faaaogāina. O loo tapena nei le fomai mo nisi o ana aoaoga e ofoina atu e aunoa ma se totogi, e lē gata mo tagata i soo se vaega o Niu Sila nei faapea Ausetalia ma nisi vaega o le lalolagi. O le Aso Lulu na tea nei na toe taliu ai le fomai i Samoa mo ona tiute masani.
