Popolega i ni faama‘i pipisi matautia e tulai mai
Ua vaaia se galuega tele ua faatautaia i le taimi lenei ona o le popolega lava o le Matagaluega o le Soifua Maloloina i le sasao o ni faamai pipisi mai le faalavelave faalenatura ua maea atu nei.
O le vaiaso lenei na agai ai lenei Matagaluega ma ana tagata faigaluega e tusa ma le toa selau aua le faamamaina o nofoaga ua aafia e pei o le afioaga o Poutasi ina ia mautinoa ai le vave ona aveese o otaota e mafai ona maua mai ai faamai pe a le faamamaina.
O se galuega na vaaia ai na o i latou lava na tatau ona faamuli atu i le Ofisa o le Soifua Maloloina i Motootua na taofia mo ia tiute a le ofisa faapea ai le vaega o le Matagaluega o loo feagai ma galuega faafomai ma tausi soifua aua le Maota Gasegase tele.
O le isi anoano na i Poutasi uma aua le faamamaina o lea afioaga.
Faaalia e le Faauluuluga o le Matagaluega le susuga Palanitina Tupuimatagi Toelupe, o gasegase e pei o le manava tatā e faaeteete lava i ai ma e ui o lea ua toe faafoi le auaunaga o le suavai i le tele afioaga e tusa ma le 40 na aafia i le galulolo, o loo fautuaina malosi le mamalu o le atunuu ina ia faapuna uma vaiinu talu ai popolega o le pepesi ai o le manava tatā.
Na faapea foi ona taua e Toelupe le tele o le fesoasoani ua oo mai i fafo e unai ai le galuega o le faaleleia atili o le suavai taumafa i afioaga ua aafia.
O le faalapotopotoga o aiga ma fanau a Malo Aufaatasi, le UNICEF le isi faalapotopotoga ua galulue nei i aoga ua faaaooga ai fanau mai afioaga e lima o le atunuu ua matua malepe faleaoga.
O le lipoti a le UNICEF na taua ai, o aoga ia ua talimalo i fanau mai afioaga ua matua faaleagaina o latou faleaoga, e moomia ai foi le suavai mama ma fale le taua mama aua le faaopoopo ai o le numera o fanau ua aoaoina i ia afioaga tu lalata ane.
O le galuega tele la lea o loo faaauau i lenei vaiaso, ina ia mautinoa lava o loo iai i se tulaga saogalemu le vaiinu a le fanau aemaise o nofoaga le taua e tua i ai le fanau.
Faaalia e le UNICEF o loo faapoopo le latou fesoasoani ua tuu atu i le Pulega o le Suavai aua le lauina o le vai mama i aiga ia e le o maua le suavai i nofoaga maualuluga ma o e le gata i le suavai ae o fanau ua leai ni togiga aua ua matua leai ni meatotino o totoe, o le a fesoasoani i ai le UNICEF ina ia faamautu ni a latou togiga e manino ai lava fanau mai i afioaga ia ua aafia i galulolo.
Ua taape solo i afioaga ua aafia, tagata faigaluega faatausi soifua, o fomai, tausimai ma isi tagata mai fafo, e nafa ma tali i puapuaga e pei ona vaaia i Samoa ina ia mautinoa e maua uma e le mamalu o le atunuu ua faamanualia le latou fesoasoani.
E umi se taimi o le taumafaiga ina ia faamama uma afioaga ma ua maua mai i le falemai tumaoti o le Medcen ua amata agai atu nisi o le atunuu mai i afioaga ia ua matua aafia i le tsunami ma gasegase e pei ona faapopoleina ai le Matagaluega o le Soifua Maloloina, e pei o le manava tatā.
