“E ala ona tāpā le toe vaavaai i le faaleleia o galuega ona ua iai ni faaletonu,” o le finagalo lea o le tamaitai na feagai ma le faatinoga o a‘oa‘oga mo sui faigaluega a le Kamupani Telefoni a le atunuu le SamoaTel i le faaiuga o le vaiaso ua tuanai.
E tusa ma le to‘a 40 alii ma tamaitai o le Kamupani i ona auaunaga eseese, amata mai i le Pulega ma faasolo mai ai ia i latou i totonu o ofisa eseese o le SamoaTel ma i latou uma e faatinoa galuega tau fesootaiga telefoni a lenei Kamupani na auai atu i le fonotaga faaleaoaoga lenei i le ofisa tutotonu o le SamoaTel i Maluafou.
Ua tāpā le Afioga Lemalu Nele Leilua e faatino nei a‘oa‘oga ona o le manaoga o le Kamupani e toe faalelei le va fealoai ma tagata o loo avea ma paaga a le kamupani. Faaalia e Lemalu e lē o le taimi muamua lenei ua faatino ai ia a‘oa‘oga, ae o le toe faamanatu ina ia mautinoa ai le tumau o le tauleleia o le faatinoga o le auaunaga a le SamoaTel.
“O tatou e iai lava le isi taimi e galo ai foi le tulaga e tatau ona feagai ai ma tagata e tau mai i le SamoaTel mo se fesoasoani ma o le faamanatu lenei o loo ave ia i latou o loo faatautaia nei auaunaga”, o se faaaliga lenei a Lemalu.
“O le toatele lava o le aufaigaluega a le SamoaTel ua mae‘a ona faatino ai a‘oa‘oga faapenei, ae o le tele lava o le alu o le ulu i isi tiute ma galuega faatino e tele ai foi ina faatuatuanai le tali e avatu i le atunuu pe a manaomia le fesoasoani, ae e tāua tele lenei vaega i le auaunaga o le lelei ona tali atu i le atunuu”.
E lua aso na faatino ai le a‘oa‘oga ma o le faafetai na momoli e le Pulega o le SamoaTel i lenei foi tamaitai ua tele ina nafa ma a‘oa‘oga faatino faapea ma ua talosagaina ai foi ma se isi a‘oa‘oga e fia faatino ia i latou o loo faatau atu pepa (phone cards) telefoni i vaega eseese o le atunuu.
“O le vaega muamua lava lenei e tau mai i ai le atunuu, ma a lelei ona fai le auaunaga e ala i le tausaafia ona tali o tagata, e faaauau ai lava le toe foi mai o i latou e moomia le tautua a le SamoaTel, ae a leaga ona tali atu i tagata, e tutuli ese foi paaga o loo faamoemoe i ai le kamupani”.