E maualuga le matou lagolago o Samoa ma lana atinae o tagata tafafao mai,”o le faaaliga lea a le alii Ofisa Sili o le Faalapotopotoga o Femalagaiga a le Pasefika ma Asia (PATA) ina ua tatala le fono tele a sui o Asia ma le Pasefika o loo usuia i Samoa mo le vaiaso atoa.
O se fono tele ua taua o le TIDES ma ua taulai i le atinae lenei o Tagata Tafafao Mai ma ona aseta e mafai ona faaleleia atili ina ia saga unai mai ai tagata tafafao.
Faaalia e le alii o Greg Duffell “o le fono lenei e tatau ona amata ai le faamalosia o taumafaiga a Samoa i le maea ai o le mafuie ma le sunami na faaleaga ai nisi o faletalimalo ma apitaga tu matafaga”.
I le manatua ai o i latou na fano i lea faalavelave faalenatura na molimauina se taimi le leoa e i latou uma sa i lea sauniga e tatala ai lenei fonotele.
Faaalia e Duffell, e pei lavas o isi atumotu o le Pasefika, o le auala sili e faatosina mai ai tagata tafafao i Samoa, o le unai lea o le siosiomaga e ese mai i isi atunuu o le lalolagi ma faalauiloa atili oloa e ese mai ai lava Samoa mai i isi atunuu.
O le toatele o loo auai i lenei fonotele o i latou o loo i Ofisa Malaga ma pisinisi tau faletalimalo.
O le Afioga i le Sui Palemia, le Minisita foi lea o fefaatauaiga aemaise Tagata tafafao mai i fafo, le Afioga Misa Telefoni na tatala aloaia lenei fonotele ma na ia faamamafa le taua o tagatanuu o Samoa, o le aseta aupito taua i soo se taumafaiga e faatosina mai tagata asiasi i Samoa.
“A le fiafia o tatou lava tagatanuu i lo tatou atunuu, e le mafai ona faatosina mai tagata mai fafo.
Ae o uiga ma auaunaga aemaise o le tausaafia o tagata Samoa, e faigofie ai ona faatosina mai tagata ese ma faigofie ai foi ona faalautele atu lea manao o le tagata asiasi mai e malaga i isi motu tuaoi o le Pasefika”.
O loo faaauau ona vaaia le agai mai pea o tagata tafafao i Samoa ae ua manino le tele o le aafiaga o le sunami faapea le mafuie i nisi o faletalimalo i Samoa.
O le Sinalei, le isi faletalimalo tele o Samoa o loo tau faaiuiu lava le galuega tele o le toe faaleleia ona na tele se vaega na faaleagaina ina ua tulai mai le tsunami.
O le isi faletalimalo tele ua iloga le faaleagaina ma o loo tau toe fausia i le taimi nei o le Coconuts Beach Resort.
O le tele o apitaga tu matafaga ua toe fausia ma o loo ua amata ona toe vaaia tagata tafafao ua agai mai i nofoaga e pei o le Foafoa i Saleapaga atoa ai le Taufua Beach Fales i Lalomanu.
O le fono tele lenei o le a maua ai ma le avanoa e asia ai e sui auai nofoaga ua faaleagaina ma o se auala foi lenei o le a galulue faatasi ai faalapotopotoga tau i femalagaaiga ina ia unai fesootaiga mo le toe faalauiloa atili o atumotu laiti e pei o Samoa.
O le tele lava o atunuu o le atu Asia ma le Pasefika o atinae lava tau tagata tafafao mai ua faalagolago i ai o latou atinae ma tamaoaiga, ma o le mafuaaga foi lea ua vaaia ai le vave o le toe galulue o i latou ua faaleagaina a latou atinae tau turisi i faletalimalo ma apitaga tu matafaga ina ia toe faafoi nei atinae i le vave e mafai ai.
