Unai tulafono tau faasalalauga

Talu ona amata mai faasalalauga e ala i Leitio ma Televise, o le tele lava o taiala sa mulimuli i ai ia Ofisa ua faaauala mai i Tulafono ua pasia e le Palemene.
O lea la ua aveese le tele o le tiute lea sa faatautaia e le Matagaluega o Fesootaiga Televavave Faaonaponei, ae ua tuu atu i le Pule Faatonu ma lona Ofisa.
O ia lea o Donnie Defreitas, o se alii Karepeane ua faauluulu i ai le faamalosiga o tulafono auā le faaleleia o soo se fesootaiga faaonaponei e aofia ai ma Ofisa o Faasalalauga.
O lana saunoaga i se fonotaga a sui faasalalau uma i Samoa i le vaiaso na tea nei, na ia ta‘ua ai le tāua tele o le maioio lelei o tulafono e lima taitaina ai galuega a nei ofisa.
O nisi o mataupu na talanoaina i lenei feiloaiga muamua, ua aofia ai le mautinoa o le laisene o soo se ofisa faasalalau auā o loo iai ofisa e lei laiseneina lava talu ona amata mai auaunaga. O le lelei o le tautua e ala i le soo ai o le atunuu, auā e lei iai lava se televise i le taimi nei ua soo atoa Samoa i ana faasalalauga.
O le lelei o ata ma le leo o nei auaunaga. Faapea ai ma le isi vaega tāua o lea faato‘ā tagofia nei i se tulafono fou o le a faavae mai i nei fonotaga, o ituaiga polokalame e faataga ona faaali i luga o le ea ma le maualuga e tatau ona oo i ai. O nei mataupu uma na faasoa i ai i latou ua vaaia ofisa faasalalau nei i Samoa.
O le taimi lenei o le TV One lea sa pulea e le Malo ua tutoatasi nei, ma o loo vaaia e le Quality Broadcasting, o le TV3 o se atina‘e a Hans Joachim Keil ma le Apia Broadcasting, o le Star TV o loo pulea e se alii faipisinisi Rarotonga/Samoa e suafa ia George Pitt, o le Kingdom TV, o se ofisa faasalalau a le Tutotonu o Tapuaiga le Worship Centre, o le TV2 a le Ekalesia Aso Fitu o le toe Afio Mai, O le CCTV a Saina, le Pro-Com o se tv totogi a Vaeolenofoafia Tapasu Leung Wai, o le Sky TV a Fiti lea foi e iai lana auaunaga i Samoa ma le Televise fou a le Ekalesia Katoliko ma Leitio a le Radio Polynesia, 2AP a le Malo, Fetu FM a George Pitt, Showers of Blessings a le Worship Centre. O loo iai foi le leitio a Saina ma Ausetalia.
E mautinoa o le tasi lenei o atina‘e aupito vave lana tupu i Samoa o le itu tau i faasalalauga, ae o le malosi o tulafono e lima taitaina ai le faatinoga o a latou auaunaga, o le mafuaaga lea o le faia o nei fonotaga.
E tele foi faaseā i le va o ofisa faasalalau aemaise i le faasoaga o pou ualesi, le felavasa‘i solo o nei fesootaiga ma tau aafia ai femalagaaiga o vaalele.
O le motusia soo o faasalalauga, o nisi nei o le anoano o fesili ma faitioga na tolaulau i lea aso o le fonotaga ma le faamoemoe lava ia talanoa ma tutufaatasi ofisa faasalalau i le faatinoga o a latou galuega.
O le tasi o mataupu na umi se taimi o talanoaina, o le tulaga lea e tatau i Ofisa Faasalalau ona amanaia tulafono o faalavelave faafuasei ma e faataga ai le faaaogāina o o latou ofisa ma pou ualesi e kamupani telefoni a le atunuu e fesootai ai faalavelave faafuasei.
E faato‘ā talanoa lava le itu tau i taui pe a tulai mai ni faafitauli i ia auaunaga faaopoopo, ae o le faamuamua e pei ona unai e lenei Ofisa o le Pule Faatonu, ina ia faatino le matafaioi o nei auaunaga i taimi o faalavelave faafuasei ma tuu avanoa ai ia i latou uma e faia galuega laveai ina ia faaaogā auaunaga ua tuu atu i ai latou e faatino.
O le fono lenei o le a faaauau i nuu ma afioaga aemaise lava nofoaga o iai pou faasalalau ina ia malamalama foi i latou i le tāua o nei auaunaga ma le moomia o eleele maualuluga mo le faatinoga o le tele o galuega tau i pou ualesi.
Talu ona pulea tutoatasi le TV One, ua manino le faigata o nuu ona ua tapa mai nei i ni tupe tetele mo le faatutu ai o nei pou ualesi, ae o se tulaga faigata tele lenei ona o le tau saili o seleni mo lea faamoemoe, o le lisi o eleele ma le taumafai e malupuipuia nei meatotino ae ua manino, a lē lava le lisi pe tuai foi ua faigata foi ona toe faaleleia ona o le itu lea o loo nofo aitalafu ai ofisa faasalalau i afioaga e ana eleele ia e faaaogā.
O le taumafaiga a le Ofisa o le Pule Faatonu ina ia oo atu e saili se fofo o lea itu ma saili foi se fesoasoani ina ia mafai ai e Samoa uma ona maua fesootaiga ma le auauanga a Ofisa Faasalalau eseese i totonu o le atunuu.