Unai malosiaga eletise maua i otaota o puaa

O le tomai ma suesuega ua faagasolo i Samoa o le saili o auala e faaaogā ai le siosiomaga faalenatura auā le gaosia o malosiaga faaopoopo.

O le maua o ia malosiaga o le a tuuitiitia ai le tupe alu a aiga, nuu ma ekalesia i le pili o le eletise e pei ona molimauina le siisii pea i luga ona o le tele lava o le eletise o le atunuu o loo gaosi i le suauu o loo faatau mai i fafo.

O le afioaga la o Gagaifo i Lefaga lea ua tatala aloaia sana atinae ua gaosi ai le eletise mai i otaota o meaituaolo se‘i tulou.

O se auala ua lē gata ina maua ai se isi auala e tau lē siitia ai le pili o le eletise i le tele o aiga ae o se auala ua tuu lelei ai foi i totonu o pa puaa nei meaola auā le faaaogāina i lenei auala.

O se tinoitupe e tusa ma le $70,000 (tala Samoa) na tuu atu e le faalapotopotoga ua lagolago i atinae a tagatānuu lautele, le Civil Society Support Programme poo le CSSP e pei ona silafia ai e le toatele na tuu faatasi ma le $10,000 tala na saosao lava e le afioaga lea ua mafai ai ona fausia le nofoaga faapitoa e gaosi ai lenei malosiaga.

E ola ai eletise i ogaumu e gasese ai taumafa faapea moli o le fale ma o se taumafaiga tele ua tutu faatasi le afioaga lenei ina ia unai.

Na tumutumu atu le itumalo ma sui o le malo i le tatalaga o lenei faamoemoe ona o le taimi muamua lea ua agai ai afioaga e faatino lenei galuega poo le atinae ona o le manaoga a lelei ona faatino e Gagaifo lenei auala o le maua ai o le malosiaga o le eletise o le a mafai ona faalautele i isi afioaga o le itumalo o Lefaga.

O Piu i Falealili ua vaaia ai foi se isi auala e faaaogā ai laau faalenatura mo le gaosiga lava o le eletise ma o Piu ua faaaogā ai laau ae o Gagaifo o otaota o puaa.

E tele ma anoanoai auala ua matauina nei ua mafai ona faatino ai nei ituaiga atinae ma o le faafetai lava lea a le afioaga ona o le lagolago foi a le CSSP latou ina ia mautinoa e maua le tupe e faatino ai atinae nei ma na faataitai ai lava le eletise i le tatalaga o lea atinae tele i le faaiuga o le vaiaso na tea nei.