O se faalapotopotoga tumaoti mai i Niu Sila ua feagai ma fesoasoani e fausia ai maota ma laoa o le au lē tagolima i Samoa, ua unai mai ai le finagalo ua tele tausaga o taumafai le malo e faaaogā e tagata o le atunuu, o le lesitala lea o fanua Samoa mo atinae.
O le faaiuga o le vaiaso na faapea ona tatala aloaia ai le lala lenei o le Habitat for Humanity NZ e pei ona ta‘ua ai. Sa iai se lala faapea na faatautaia i Samoa i tausaga ua tuanai ma na tele lava ina galulue faatasi ma le lala lenei o Apitaga o Tagata Soifua e pei ona faaigoaina ai i Samoa.
O le latou galuega o le tatala lea o avanoa e mafai ai e tagata ua mautinoa ma faamaonia e lē gafatia ona fausia ni o latou maota poo ni laoa foi, ona talosaga mo ni nonogatupe e tau leai ni tului e faatautaia ai ia galuega a o latou aiga. O le lala o le Habitat for Humanity poo le Apitaga mo Tagata Soifua lea sa iai muamua, na iai a latou feutagaiga ma tagata talosaga mo fale ina ia mafai ona totogi atu e lē ua talosaga se tinoitupe e $1000 ona amata ai loa lea o le galuega.
O isi uma totoga o se maota e sau i le nonogatupe atoa ae o le fausia o ia maota e tele ina malaga mai sui o le faalapotopotoga lenei mai i Niu Sila faapea ai Ausetalia ona o latou fausia lea ae e lē totogia.
O loo faaauau foi lea fesoasoani i le faalapotopotoga fou lenei ua faatū mai i Niu Sila. O le eseesega o le a leai se $1000 e pei ona ta‘ua ae o le a unai i latou e talosaga e mafai loa le nonogatupe e muamua lava agai e lesitala ni fanua Samoa pe afai o maota e fia fausia i luga o eleele umia i le faa-Samoa ma ia mafai ona liliu i eleele umia saoloto (freehold land) ma faamau ai loa le aseta lea mo nonogatupe o nei maota.
E talitonu le faalapotopotoga o le a faaitiitia ai le mafatia o aiga lē tagolima poo fea o le a agai i ai e totogi le $1000 e pei ona iai le faatautaiga muamua o lea fesoasoani.
E iai nisi ua amata lagalaga le mataupu ma ua faapea ona fesiligia pe lē o se auala lenei ua galulue faatasi ai nei lea faalapotopotoga atoa ai ma le Malo ina ia taumafai e maunu atu fanua nei o le atunuu aemaise o lea o le a agai e ave fanua nei e lesitala ma faapea ai loa ona maua e le Malo.
O le isi fesili afai la e lē mafai e le aiga ua fausia le fale i lalo o lenei polokalame ona toe totogi le tupe o le nonogatupe lenei – o ai la e avea le fanua lea ua faamau ai le fale atoa? E lei iai se tali na aumai i lea mataupu pe laga foi i le saunoaga a le taitai o le Malo na ia tatala aloaia lenei faamoemoe sei vaganā ai le faafetaia o lenei fesoasoani tele ua mafai e Samoa ona maua auā le fesoasoani ai ia i latou ua ta‘ua o tagata lima vaivai i le faatinoga o nei manaoga ua tele tausaga e lē mafai ona faatautaia i le lē lava o le faasoa.
O le faalapotopotoga lenei mai i Niu Sila na faapea foi ona vave lana tali mai ia Samoa i le vaitau o le tsunami e pei ona o latou malaga mai ai ma fausia nisi o maota mo aiga na aafia i lea foi faalavelave faalenatura. O se faalapotopotoga kerisiano i le lalolagi atoa ua iai ona lala i le tele o atunuu o le lalolagi.
O lea la ua fesootai ma le Malo i polokalame ma ua mautinoa o le faamuamua ua o latou ave i le ofo atu o le fesoasoani i tagatānuu o Samoa ae ona pau lena o le fesili lea ua lagalagā nei, pe faamata e lē o se auala lenei a faaletonu loa le faatinoga o le maliega mo talosaga o maota, o le a le na o le fale loa e aafia ae o le a aafia foi ma fanua o aiga.
