O le vaiaso lenei o loo faagasolo ai le fono a taitai o Malo o le Pasefika i Palau i lona laumua o Koror. O lenei fono o loo taitai ai e le Palemia o Samoa le usugafono a Samoa i lea atunuu o le atu Maikoronesia. O se fono tāua i le toe iloiloga o Fuafuaga a le Pasefika, le Pacific Plan i lona aotelega i atinae ma auala e puipui ai le itulagi i suiga ua feagai ma ia aemaise i suiga ogaoga o le tau.
O le autu o le fono tele lenei o le Gataifale, o le Lumanai. O se autu ua ta‘ua e le faauluuluga o le Ofisa o le FORUM ia Tuiloma Neroni Slade ua talafeagai lelei ma le taumafaiga a Malo o le Pasefika e unai le tāua o le gataifale o le Pasefika i le fono a malo laiti tau atiae o le lalolagi lea e usuia i Samoa ia Aukuso ma Setema o le tausaga lenei.
O le SIDS ua mafai ai ona faaleo se finagalo o Malo o le Pasefika i atugaluga o loo feagai ma atumotu i lenei vaitaimi i suiga ogaoga o le tau aemaise o le taumafai lea e puipui le Vasa Pasefika lea ua agai mai i ai le tele o malo tetele ona ona pau lea o le ogasami o loo tele lava le i‘a o loo maua ai.
O le fono muamua lenei ua lē auai faatasi atu ai le Palemia o Niu Sila atoa ai ma le Palemia o Ausetalia. Faaalia e Toosavili John Key, ua lē mafai ona auai ona o lea ua toe o se aga faatino le faiga filifiliga tele a le Malo o Niu Sila e ala i le palota, ma e lē mafai ona agai mai i lenei fono a taitai o le Pasefika ae e lē o mautinoa le faaauau o lona tulai mai o se taitai o Niu Sila i le mae‘a ai o le faigapalota.
O lea la ua manatu ai e lē talafeagai lona agai atu e fai ma taitai o Niu Sila i lea fono tele. Mo le Malo o Ausetalia, o le Sui palemia o lea malo ua agai ane i le fono ona na ta‘ua e le alii Palemia, o Tony Abbot e tele lava galuega o loo moomia ai o ia i totonu o Ausetalia i le taimi lenei ma o le mafuaaga lea o le ave o le faamuamua i ia mataupu o loo ua faapea ona moomia ai lana taitaiga mo lona atunuu ae o loo iai lona soatau e fai ma sui o Ausetalia i le fono a taitai o le Pasefika.
O le fono lona 45 lenei a taitai o Malo o le Pasefika ma o sauniuniga a le Pasefika i folasaga o le a unai i le fono a Malo laiti tauatiae o le Lalolagi le SIDS le isi vaega tele o le a taulai i ai feiloaiga i Palau i lenei vaiaso.
O le taimi lenei o le tamalii o Samoa o Tuiloma Neroni Slade lea e faauluulu i ai le FORUM ma o ia foi ua laga le ono faamavae i le mae‘a ai o lenei tausaga ae e lei faamautu lelei mai lea tulaga.
O lea foi o le a sauni atu ai talanoaga o lenei vaiaso i taumafaiga a Fiti ina ia toe ofi atu i lenei li‘o o malo o le Pasefika talu mai ona faatea ese mai i le FORUM i ana pulega faafitafita.
O lea la ua alo atu Fiti i lana palota tele i le faaiuga o le tausaga ma e pei ona ta‘ua e le alii Palemia o Samoa, le susuga Tuilaepa Lupesoliai Sailele Malielegaoi, se‘i vaganā ua mafai e Fiti ona toe mulimuli i pulega faatemokarasi e lē mafai ona toe ofi mai i totonu o lenei li‘o.
