E faigofie lava ona fesootai le siosiomaga ma ona puipuiga ma le au folau – o lo latou siosiomaga atoa – nofoaga o loo galulue ai ua faatino i le vasalaolao.
Ua faigofie ona vaaia ai suiga ogaoga o le tau ua iai nei ma ua iai ma le popolega ia i latou o loo fai ma o latou vaisu le folau i le vasa i nei suiga ma le aafia ai o soifua o tagata.
O se lagona foi lea ua unaia ai e i latou o loo ua fai ma sui o Samoa i le folauga tele ua toe faatino nei e vaa o le atu Polenisia – le auvaa a le Gaualofa i le feagai ai ma lenei polokalame tele, ina ia faatino le taumafaiga a le atu Polenisia e ala i le toe uia o ogasami na manatu na agai mai ai i le Pasefika – ma faalauiloa atili ai le tulaga ua iai nei le siosiomaga o le gataifale lea e ola faalagolago i ai tagata o le Pasefika i lenei vaitaimi.
O le faigamalaga lenei e aofia ai Niu Sila ma agai ai i vaega eseese o le Pasefika seia oo i Hawaii, ua faamauina uma e le auvaa a le vaa lea o Samoa le Gaualofa.
O loo galulue nei ma le Ofisa o le Siosiomaga o le Pasefika le SPREP i le aoina o
faamaumauga e mafai ona faalauiloa i atumotu uma o le itulagi i auala e mafai ona
faasao ma aputiputi ai tagata o le Pasefika i lo latou siosiomaga O auala ua mafai ona faasao ai le siosiomaga o le gataifale ma isi lava faiga e mafai ai e le tagata soifua ona umi se fesootaiga ma le siosiomaga mama ma le saogalemu aua tupulaga fai mai.
O le aoina o faamaumauga ma le talaina o nei galuega uma ua faia ai aoaoga a le auvaa e pei ona faatautaia e le SPREP.
O le tausaga lenei ua faataua ai i totonu o Samoa le siosiomaga atoa o le eleele ma le sami ma o ina tonu ua aofai ai aoaoga nei ua faatautaia mo le auvaa.
Faaalia e le SPREP ua aoga foi le folauga tele lenei ua unai atu ai ma le feau taua i le aafiaga o le Pasefika ona o suiga ogaoga o le tau e pei o le siisii o le sami, le vaaia ai pea o faalavelave faalenatura e pei o le sunami na aafia ai Samoa, Amerika Samoa ma Tonga i le tausaga na te’a nei aemaise afa fulifao o loo afea ai pea atumotu laiti.
O a lava auala o le a mafai ai e i latou nei ona fesoasoani mai ai i suesuega a le SPREP ua faamaumau nei, aua le faalauiloa atu i tagata nuu o atumotu o le Pasefika o le a afea e le Gaualofa i lenei faigamalaga tele.
O le faigamalaga lenei ua aofia ai ma vaa mai isi atumotu e ono o le Pasefika lea foi o loo iai ma le vaa o tagata Maori i Niu Sila.
O Tahiti, le Atu Kuki faapea Tokelau ma Samoa, o nisi ia o atunuu e afea e le Gaualofa a o lei faaauau atu ai i Matu o le Pasefika i Hawaii.
O loo faapea foi ona faamoemoe i le auvaa lenei le lipotia o ogasami o loo vaaia ai le masaa ai o suauu o vaa, o nofoaga ua tele ai le otaota lafoai aemaise isi afaina o le ogasami o lenei vasa tele o le Pasefika.
Faaalia e Caroline Vieux – o le sui o le SPREP o loo nafa ma le pulea o suesuega i amu o le Pasefika, e le faigofie le galuega ua ave i le auvaa a Samoa ae o le faamoemoe o le a mafai ona faatino ai suesuega ua faigata ona faatino i lenei vaitaimi ma o le a tele le ogasami e aofia i lenei folauga e faafaigofie ai ona maua mai ai ni faamatalaga maumaututu i nisi o vaega o le vasa Pasefika ua aafia ona o gaioiga a le tagata.
E 6 afe (US$6,000) tala Amerika ua ave e le SPREP ma le isi faalapotopotoga o le siosiomaga e taua o le CRISP i le asosi o Foalauga o le Sami a Samoa ina ia faatino ai lenei galuega.
