Mai lava i le uluai aso na tupu ai le faalavelave o le sunami i Samoa e oo mai i le taimi nei, e lei mālōlō lava le Habitat for Humanity, auā ua latou talitonu o la latou tiute tauave lea ua valaauina ai i latou e le Atua, o le fausia o fale mo aiga mafatia.
Na taunuu i Samoa se aumalaga faapitoa mai Niu Sila mo le faamoemoe se‘i asia ma umusaina nisi o fale ua mae‘a ona fausia, faatasi ai ma le tali faaaloalo a le Hai Komesina o Niu Sila i Samoa e faafetaia ai i latou sa galulue ma fesoasoani i le fausia o fale ua mae‘a.
Na malaga faatasi le taitaifono ma sui o le Komiti Faafoe o le faalapotopotoga o le Habitat for Humanity Niu Sila faatasi ma nisi o ta‘ita‘i o faalapotopotoga tuma‘oti ma ekalesia mai Niu Sila.
O i latou sa galulue faatasi ma le Habitat e saili tupe, ma ofoina tagata galulue mo le fausiaina o fale fou.
E aofia i lenei faigamalaga se sui o le faalapotopotoga o le World Vision, Francis Davy, faapea le susuga ia Faavae Gagamoe o le pule o fefaatauaiga o le itu Pasefika a le Air New Zealand, Russell Thorp sui o le Global Connections in Mission, sa o latou foaiina se tino i tupe tele mo le fauina o fale.
O sui o le leitio Radio Rhema faapea ma susuga i faafeagaiga ia Lui Ponifasio ma le susuga ia Tavale Mataia, o i laua sa taimua i le Rebuild Samoa lea sa soosoo tau‘au ma le Habitat i le tuufaatasia o fesoasoani mai ekalesia mo le fauina o fale i Samoa.
Na taunuu le faigamalaga i afioaga eseese ma sa maua le avanoa e talatalanoa ai ma nisi o loo alaala pea i afioaga e tusa ma le tulaga o iai le soifuaga ina ua mavae le valu masina o le galulolo.
E ui lava ina vaaia loimata ae sa mautinoa le faalototeleina o le toatele faatasi ai ma le agaga faafetai mo fale ua fausia.
Na muamua asia afioaga i le Atu Falealili ma faasolo atu ai i le afioaga o Lepa. O Lepa o loo faamautu ai le Habitat for Humanity e pei ona api ai i le maota o le Ekalesia Faapotopotoga Kerisiano Samoa aemaise le fesoasoani a le afioaga. O i foi o loo iai le nofoaga faapitoa o loo tapenaina ai fale fou.
Na talimalo le susuga i le faafeagaiga ma le ekalesia auā le mālū o le taeao ma faasolo ai le faigamalaga aga‘i i Saleapaga i le aai fou ua nonofo ai nei le afioaga i uta.
O fale na fausia e le Habitat i Saleapaga sa faatupeina e le kamupani telefoni o le Digicel.
E tele nisi fale fou o loo fauina i le taimi nei ma ua iai ma faleoloa ma ua fai foi ma faatoaga. O loo amata foi se galuega tele a se tasi o ekalesia mo le malumalu tapuai.
Na sosoo lea ma le umusaina o le fale ua avea ma faamanatu mo le auso tamaitai e toalua o Petria ma Rebecca Martin mai Niu Sila lea na maliliu i le sunami.
O lea fale na faatupeina e le nuu o Matamata i Niu Sila.
O malo faaaloalogia o lea sauniga na aofia ai le afioga i le Masiofo Filifilia Tamasese, o ia foi o le faatina o le faalapotopotoga o le Caritas sa latou faatupeina le tele o fale.
Ua tuuina atu nei lea fale i le susuga ia Iulai Salesa ma lona aiga. E toalua i latou na maliliu i lo latou aiga e aofia ai ma si ona afafine.
Na faaauauina le faigamalaga aga‘i i Saleaumua mo le umusaina o se tasi o fale na fausia i le fesoasoani a le Caritas faatasi ai ma le kamupani o le ‘Warehouse’ mai Niu Sila.
Na mālōlō le faigamalaga i le nofoaga fou o le Taufua Beach Fales i Lalomanu. Na talimalo le susuga ia Penita (Ben) Taufua ma le aiga alii mo le taumafataga o le aoauli.
Na faatasi mai le Hai-Komesina o le malo o Niu Sila, Caroline Bilkey ma le Minisita o ‘Oa Faanatura ma le Siosiomaga, le afioga ia Faumuina Tiatia Liuga.
O le polokalame faaiu o lea aso o se fiafia sa talimalo ai le Hai-Komesina o Niu Sila.
O lea fiafia sa auai le afioga i le Masiofo Filifilia Tamasese, le afioga i le alii Palemia Tuilaepa Lupesoliai Sailele Malielegaoi, o nisi o le Kapeneta o le Malo o Samoa, ma ta‘ita‘i o faalapotopotoga tuma‘oti.
E ui i le toatele o malo faaaloalogia i lea po, peitai na ave le faamuamua ma le faafetai faapitoa i le aufaufale.
O alii ma tamaitai kamuta, faieletise, palama ma isi o le aufaigaluega na ofoina atu o latou taimi e leai se totogi e fesoasoani ai ia Samoa. E tusa ma le 50 i latou o loo i Samoa i le taimi nei, ae ua sili atu i le 500 ua foi mai ina ua mae‘a le tai 2 vaiaso poo masina foi o galulue i Samoa.
O le toatele o i latou nei e malaga mai Niu Sila. O se tasi o alii Maori ua faatolu ona malaga i Samoa i le ono masina ua tuanai e ofoina atu lana fesoasoani.
Na saunoa le afioga i le alii Palemia e faafetaia i latou. I se vaega o lana saunoaga faafetai na ia ta‘ua ai e faapea, “O le tele o taimi tou te tausasami ai i taumafa tou lē masani ai ma taumafai fuefue ese le tele o lago i le ao.
I le po e ‘ai outou e namu taufeai, ma mogamoga e tolotolo solo i luga o outou moega.
O le tele o faama‘i e lamatia ai lo outou ola, peitai sa outou lē faatafa ae na faamuamua lo outou malaga mai e tuuina mai lo outou fia fesoasoani mo o matou tagata”.
Na faaiuina le faamoemoe i se faafiafiaga mai le autalavou a le EFKS mai Lepa, ma toe taliu mai ai le faigamalaga i lea lava po.
