Umusa le Faletele Aiga Sa Toomata i Samata i tai

Auā o le faamoemoe ua taunuu, o le laau o le soifua lea, ae o le upu a le Tusi, a mae‘a ona faia o se galuega ua lelei ma matagofie, ona ave lea ma faafoi le viiga ma le faafetai i le Atua ma faapea ane, ‘o tatou lava o ni auauna lē aogā.’
O se vaaiga matautia ma le matagofie na molimauina i le vaiaso na mavae atu nei i tapenaga ma sauniuniga a lenei foi aiga ina ua mae‘a lo latou faamoemoe sa fauao faupo i le tau fuafuaina o le faatinoga mai i tausaga ua mavae atu ina ua mae‘a afā tetele o Ofa ma Valelia, na faaleagaina ai nisi vaega o le maota. Lea la ua faatinoina ma ua tulaga matagofie mai i totonu o le aai o le alalafaga o Samata i tai, ma o se vaaiga lalelei tele.
O le faatinoga o lenei galuega tele sa tagi lava i lima. Sa soalaupule lava ma faasafua mai loa e a latou afioga i Sa‘o o le aiga, afioga ia Toomata Tua Afamasaga, Toomata Alapati Toomata, Toomata Leota Alapati Shuster ma Toomata Aki Tuipe‘a, i matai uma o le aiga le saogatupe lea la ua tulaga mai ai lenei maota matagofie.
O le loto faafetai tele ma le agaga faamanū i le Atua, auā o lea ua mae‘a ma ua tau lau o le faamoemoe. Se mea foi e manaia ma le matagofie o le loto gatasi, loto aiga, felagolagomai aemaise o le soifua tautua o tagata e ala lava i le alofa, auā o le alofa lava e mafai ai ona faatino soo se mea.
O le susuga i le faafeagaiga o le nuu a le Ekalesia Faapotopotoga Kerisiano Samoa (EFKS), le susuga ia Aukuso Taumate sa na taitaiina le lotu o le umusaga faatasi ai ma isi faifeau na latou lagolagoina le sauniga na momoli ai le faamanū ma le viiga i le Atua i lea aso.
Ia o faiga masani lava o aso faapenei auā na matuā faatumulia foi lenei faamoemoe i sui mai le itumalo Salega aemaise o tagatānuu o uo ma aiga uma na mafai ona auai na latou molimauina le tatala aloaia o lenei maota matagofie.
E momoli le faamalo ma le faafetai tele ma le loto faamaualalo i sui uma lava o le aiga Sa Toomata i soo se vaipanoa ma soo se vaega o le lalolagi o loo alala ma papaaao ai i latou uma na mafai ona togimaa ma faatinoina lenei galuega tele i soo se auala lava, e lē gata i tupe, o meataumafa, o le auai ma galue i le faiga o le fale, aemaise ai lava foi o le nofo tapuai ma le nofo tatalo atu pea o nai o tatou tuaa matutua i soo se kelope. Malo galulue, malo le onosai, malo tauata‘i faafetai le alolofa.