“O taleni uma e mai le Atua ia”. O le gagana masani lea a tagata pe a lauga i ni umusaga o ni galuega tetele ma le lelei, e pei la o le umusaga o le uluai CD ua ta‘ua o le “Magnify” a lenei alo o le atunuu.
Na faatumulia le Te Rauparaha Arena i Porirua i le po o le Aso Toonai na tea nei, i ekalesia eseese ma susuga i Faafeagaiga i le faapaiaina o lenei CD faalelotu ma o se mafutaga sa toatele ni aufaipese mālie eseese sa faafiafia ai.
E uigaese foi le mālie o faiga a le susuga i le MC, o se tasi foi o alii lauiloa i le musika ma le pese leo malie o Lapi Mariner lea na fai ma Fofoga o lea po matagofie.
O Salatielu (T.J.) o le alo o le Faafeagaiga ia Pastor Saunoa Arona Taotua mai Salelologa. O si ona tina o Alofa e mai le afioaga o Palauli ma Satupaitea. Na tumutumu ai foi aiga o Salatielu e taufai ofo le viiga o le Atua ona o lenei CD ua faia mo le lagiina o faaneetaga i le Silisili Ese e lenei tamafanau a le aiga ua ta‘u ai foi le atunuu o Samoa aemaise o nuu ma le aiga faapea ekalesia.
O le susuga i le faifeau ia Pastor Tofilau Kerupi Tavita ma Jacob Semeri na molia talosaga ma faamanuiaga mo Salatielu ma le CD. Na soifua mai Salatielu i le afioaga o Salelologa ma sa malaga mai lenei alo o le atunuu ma ona mātua mai Samoa i le tausaga e 1982, ae faatoa lua ona tausaga, ua 34 nei lona matua ae o loo lelei pea lana gagana Samoa.
O le galuega faamusika i totonu o le AOG na amata ai le galue o lenei alo i le taina o le kitara ma le peseina o viiga o le Atua i Porirua.
Na ta‘ua e Salatielu o loo lolotu nei ma lona aiga i le ekalesia a le susuga ia Lui Ponifasio ma le faletua ia Ane Ponefasio i le New Life Church i Manuwera i Aukilani, e lei leva ona sifi atu i ai i Aukilani mai galuega sa galue ai i le Laumua i Ueligitone nei.
E faamanuia atu ai le Sooatulau ma sui o le Samoa Times i lenei alo ua tulai mai i lenei foi galuega o le musika.
