Na matuā tumutumu tagata o atumotu Pasefika o le itumalo o Ueligitone ina ua umusaina le Taiala mo Aoga i le afiafi o le Aso Tofi 31 o Ianuari i le maota o le ekalesia EFKS i Waihemo, i Porirua.
Sa faamanuia e le Afioga i le Minisita o Aoga ma Atumotu o le Pasefika, Hon. Hekia Parata le Tomatau/Taiala Pasefika faatasi ma lona tima‘ia o tagata Pasefika ina ia faatāuaina le auai o le fanau i aoga laiti faapea ma le lagolagoina o le itu tau aoaoga mo le lelei o tupulaga Pasefika i Aotearoa. Na ia faatāauaina foi le auai o mātua Pasefika i Komiti Faafoe o aoga ina ia latou silafia ai tulaga tau pulega o aoga auā lava le manuia o aoga a le fanau.
O le alo lava o Samoa o Masei Alipia mai le Kolisi a Aotea na fai ma Fofoga o le polokalame, ma sa manaia lona faafoega o lea faamoemoe. Na maua foi le avanoa e faafofoga ai le aofia i saunoaga mai sui o le Teach NZ, sui o le sikolasipi o le Pacific Islands Polynesian Education Foundation, Komiti Faafoe ma alo foi o Samoa na iloga lo latou alualu i luma i itu tau aoaoga.
Matagofie faafiafiaga na saunia e tamaiti laiti mai le Aoga Amata a Toru Fetu, aufaipese a Kuki Airani, ma le aufaipese a le Autalavou a le EFKS i Waihemo na tovā ai isi saunoaga.
O le tatalo amata na saunia e Rev. Teremoana Tauira, ae o le Tofa a Faatili, le Failautusi Aoao a le F.A.G.A.S.A na fetalai e fai ma sui o le aofia e faafetaia le Ofisa o Aoga, le susuga ia Nove Vailaau ma le ekalesia i Waihemo na tapenaina le taumafataga, faapea sui o Samoa o galulue i le Ofisa o Aoga. Na ia faafetaia foi le aofia na potopoto ai e lagolago le faamoemoe.
Na saunoa Rev. Nove Vailaau e faaiuina le polokalame i le tatalo ma faasolo atu ai le aofia e tali le sua i le taumafataga ma faasoifuaina ai le afiafi.
