“Na o mai o le fia maua o se galuega e tausi ai aiga ma fanau, ae ua ou fiu, ma ua lē faatasi ona tupu mai pea le fai o gaioiga ua gaoia ai a‘u oloa ma tupe, toe lē faamaoni e usu mai i le galuega”.
O le faamatalaga lea a le tamaitai pule o le kamupani o le, Le Vai o Fatima Strickland, ina ua faia se talanoaga i le telefoni e faatatau i le mafuaaga na tapunia ai lana kamupani i le Aso Toonai, 7 o Ianuari 2012, ina ua maua se gaioiga fai faatasi a ni tagata faigaluega se toafitu sa galulue i lana kamupani.
“O pusa faguvai o le kiliva na mafua ai ona fai la‘u faaiuga e faamalolo”.
Fai mai Fatima e lē o le taimi muamua lea ua faamalolo ai ni ana tagata faigaluega ona o le lē faamaoni, ma o le tausaga na tea nei ma isi tausaga i tua atu, o le mea lava lea sa fai ma aliali mai.
“Ou te iloa pe a fua i le tausaga ua tea atu nei ua ova lava i le 600 selau afe le tau o a‘u oloa ma tupe ua toesea i le lē faamaoni”. Ua faatalatalanoa nei e Fatima isi tagata faipisinisi i se auala e mafai ai ona latou galulue faatasi e tafiesea ia faiga lē faamaoni, ona na ta‘ua e le tamaitai Pule e lē na o lana pisinisi o tupu ai. “Toatele ia o isi aufaipisinisi ua latou fai mai e manaia tele ae faatū se matou faalapotopotoga e faatatau tonu lava i le faama‘i lea ina ia puipuia ai a matou oloa ma meatotino”.
E talitonu Fatima o se gasegase pipisi le lima tagoese ma le lē faamaoni o tagata faigaluega, ma ua tatau ona faia i ai se togafiti vave.
“Ou te musu e faasalalau o latou igoa i nusipepa, ae o se tasi lea faiga e mafai ai ona ta‘u atu i isi pisinisi e lē tatau ona latou toe hire ina tagata faapea”, na saunoa ai le tamaitai pule o le Le Vai.
O le mau a le tamaitai pule o le mafuaaga lea ua faafaigaluega ai e nisi fai pisinisi tagata mai fafo e pei o tagata Filipino ma tagata mai Fiti ona ua fiu i amioga a tagata Samoa.
“E amata mai lava i totonu o aiga le faafitauli”. E iai le talitonuga o Fatima o le tele o faalavelave fai e manaomia ai seleni o le mafuaaga lea o le lima vavave o nisi tagata faigaluega i meatotino a pisinisi aemaise lava seleni.
“Ua tatau lava ona tau fai se faiga i faalavelave nei, auā o le mea lea e mafua ai ona tupu le agasala o tagata faigaluega ma tagolima loa i meatotino a se kamupani ma se pisinisi o loo galue ai”.
O le toafitu o tagata faigaluega na faamalolo ae faato‘ā amata galuega o le tausaga mo le pisinisi a Fatima ua suesueina e leoleo, ma o le a tutulai i le faamasinoga e tali i ni moliaga.
