Uluola le aiga o Pata Sauni ma Sileiloga Pata o Malie

Suli o Pata Sauni ma Sileiloga Pata
Suli o Pata Sauni ma Sileiloga Pata

O le faamoemoe ua taunuu o le laau lea o le ola, o lupe foi sa va o eseese a’o lenei ua fuifui faatasi i le alofa ma le agalelei o le Atua. O le taulaga lea o viiga i le Atua i le aso muamua le Aso Tofi 27 o Tesema na uluai feiloai ai suli o le tamā ia Pata Sauni ma le tina ia Sileiloga Pata i le Memorial Hall i Magele i le toe faataunuuina lea o le reunion a le aiga e pei ona masani ai i le ta’i lua tausaga ma faataunuu.

O le 2016 na faatinoina ai lenei faamoemoe o le aiga i Samoa ae o le tausaga ua mavae na see mai ai loa i laufanua o Aotearoa i Aukilani lea na iloga na tumutumu ai suli uma o le aiga o ē na tupuga mai i nei mātua ia Pata Sauni ma Sileiloga Pata o Malie. E toafitu i latou na tupuga mai ia Pata Sauni ma Sileiloga e aofia ai Atopo, Sailusi, Talaluma, Maliota, Sau, Timu ma Meaalofa.

O nei faletama uma sa auai uma mai i le faamoemoe o le aiga, oe o loo aumau i Amerika, Hawaii, Ausetalia faapea foi ma Samoa faatasi ai ma Niu Sila nei, ae o se avanoa lelei foi ua mafai ona faatasi mai ai ma lupe faalele o le aiga o loo tautuaina le finagalo o le Atua i totonu o fatafaitaulaga eseese. E tasi le faletama e lei mafai ona auai mai o suli ia o Talaluma, ona sa fetaui le faatinoina o lenei faamemoe ma isi fuafuaga o le aiga i Samoa e pei ona auai atu iai.

Tuaa matutua i totonu o le aiga
Tuaa matutua i totonu o le aiga

O le augatupulaga lona lua poo i latou sa tupuga mai i fanau o le toeaina ia Pata ma Sileiloga, o i latou ia o loo latou faamaopoopoina lenei faamoemoe e pei ona avea ai le afioga ia Faamausili Tauvela Sauni ma lona faletua ia Lapaili Tupai Sauni ma Sa’o o le aiga faatasi ai ma nisi o lea augatupulaga o loo soifua mai pea i le taimi nei, o loo faufautua ma apoapoai ia latou fanau poo augatupulaga tolu ma le fa i le faamaopoopoina o mea e fai o le aiga aemaise lava i faatasiga faapenei.

O le auga o aute ma le sini autu o lenei faatasiga, ina ia mafai ona maua e fanau lalovaoa i totonu o le aiga le nofo fealofani ma le felagolagomai, ma ia malamalama le isi faletama i le isi faletama. O le auga tonu lea o le aso muamua na uluai feiloai ai le aiga, o le faamasani lea ma faailoa faletama a aiga taitasi poo ai tonu e tupuga mai ai.

Afioga ia Faamausili Tauvela Sauni, Sa’o o le aiga ma lona faletua ia Lapaili Tupai Sauni
Afioga ia Faamausili Tauvela Sauni, Sa’o o le aiga ma lona faletua ia Lapaili Tupai Sauni

Mai i le faamoemoe o le aiga i le 2016 sa iai nisi sa auai ua oo mai i lenei faatasiga ua lē mafai ona auai ona ua maliliu, ae o le tupu ma ola o le aiga ina ua oo mai i lenei tausaga ua toe faaopoopo nisi suli fou o le aiga ina ua foai e le Atua nisi oloa tāua i totonu o le aiga i le taimi nei ma o foliga vaaia ia o le lelei o le Atua i faamanuiaga ma meaalofa eseese o loo foai i totonu o le aiga.

O le tele o polokalame o le faamoemoe o le aiga sa iai o taaloga ma le faatāuaina o le soifua maloloina lelei e ala lea i zumba faatasi ai ma le faamasani lelei o fanau. Ae lē gata i lea o le fia faafofoga lea o fanau i le tala o le gafa o le aiga poo le ā se toatele o suli na tupuga mai ia latou tuaa ia Pata Sauni ma Sileiloga Pata.

O augatupulaga tolu ma le fa na tupuga mai i nei tuaa sa latou saunia polokalame uma o lenei faamoemoe ma o le suiga tele lea sa iai lenei faatasiga ona ua mafai ona ta’ita’i ma faatautaia e fanau ni faatasiga tetele faapenei e tuufatasia ai loto o aiga ma maua ai le nofo fealofani o mātua ma fanau, auā o le sini lea ma le finagalo moni o Iesu Keriso i totonu o aiga, ia tatou maua le nofo feaofani.

O le Aso Toonai 29 o Tesema na tapunia aloaia ai loa le faamoemoe o le aiga ma le faamoemoe maualuga e toe maua le isi faatasiga faapenei o suli o Pata Sauni ma Sileiloga Pata i le isi lua tausaga o lumanai, ae o le a toe talanoa le aiga poo fea le atunuu o le a see atu iai le isi reunion.