O le tofa ia Seulupe Falaniko Sitagata Falaniko Tominiko o le Iunivesete o Aukilani, ma lona uso laititi o Edward Peter Sitagata Tominiko mai Ausetalia o ni uluai tatau ia sa tāina i totonu o le Iunivesite ona o se vaega o le polokalame i le faatāuaina o tu ma aga faa-Pasefika e aofia ai ma Samoa.
O le fetalaiga ia Seulupe Sitagata Falaniko Tominiko o loo aotauina i le Iunivesite i le faailoga o le Ph D, (Ph D Student Auckland University) ae ua ia lalagaina se isi matalalaga fou e ala i le tomua mo le laeiina o le laei o le atunuu poo le tatau e pei ona lauiloa ai Samoa i le lalolagi atoa.
O le Aso Faraile, 19 o Aukuso 2011 na tea nei na umusaina ai le uluai tatau ua tāina i totonu o le Iunivesite o Aukilani i lalo o ana polokalame mo a‘oa‘oga faa-Pasefika.
O le fale Pasefika lava i totonu o le Iunivesite sa faataunuuina i lea faamoemoe. E lua ma le ‘afa vaiaso sa faagasolo ai lenei faamoemoe seia oo ina umusaina i le Aso Faraile na tea nei.
Sa maitauina ma le agaga faagaeetia ma le maofa i le toatele ma le anoanoai o alo ma tamafanau a atunuu eseese o loo aotauina i le Iunivesite i Aukilani sa molimauina lenei faamoemoe mai le amataga sei oo i lona faaiuga, e lē gata i alo ma fanau a Samoa sa auai ae faapena foi le tele o alo ma tamafanau a isi atunuu na faaalia lo latou naunau i lenei measina poo le laei Samoa moni o le ‘TATAU’.
O le Matua o Faiva na faatinoina le faamoemoe o le susuga ia Su‘a Suluape Petelo, le paia i lo la falelua ma le mamalu i le aiga sa Su‘a. Sa faatumulia le fale Pasefika i le mamalu o faiaoga o le Iunivesite, tama ma teine aoga ae faapea foi aiga, uo ma le auvalaaulia sa molimauina le umusaina o nei tatau.
Na amata le samaina o tatau i le sauniga lotu sa taitaiina e le susuga i le Faafeagaiga a le Iunivesite, le susuga ia Uesefili Unasa.
O le mae‘a ai o le sauniga lotu ona faatino lea o tulaga masani o aso faapenei, sosoo atu ai lea i le alo o aiga na lua auā se afu ma faaaloaloga mo le Matua o Faiva. O le susuga lava ia Sitagata Setefano Tominiko sa fai ma fofoga o aiga na lua.
Ina ua mae‘a faaaloaloga ma faiga masani i aso faapea ona alo ai loa lea i le taumafataga tele sa saunia lava e le Iunivesite o Aukilani ona ta‘ape ai loa lea ma le Fiafia.