O loo laalaa pea i luma alo ma tamafanau a Samoa, i vaega eseese o tomai tau faafiafiaga. O le tamalii Samoa o Amituana‘i Timoteo Maneta Pepe poo Ami e pei ona lausilafia ai, o se uluai Samoa ua ulufale ma oo atu lava lana taumafai i se tulaga maualuga, i lenei foi tomai o le fofogaina o se lauga i le gagana Peretania, i se kilivaina e mālie, mo le fuafuaga ia taliē ai le aofia o loo faalogologo.
O Iuni i le tausaga 2012, na uluai ulufale ai Ami i le Toasmaster i Manukau Aukilani. O inā foi i le masina o Iuni na fai ai ni tauvaga lauga ma sa manumalo ai Ami i tauvaga lauga e lua, ma faasolo atu ai lava i le tauvaga faaiu a Aukilani e pei ona faia i le masina o Oketopa, lea foi sa lipotia atu i tusitusiga a le Samoa Times (6 Novema 2012).
O le tauvaga faaiu lea ia Oketopa 28, 2012 sa tauva ai sui mai isi pitonuu eseese o Aukilani (Regional Humorous Speech Contests), ma o le iuga na manumalo aoao Ami Pepe i lea tauvaga, ma sauni ai loa e fai ma sui o Aukilani mo le tauvaga a le atunuu aoao (National) lea sa faatautaia i Hamilton i le aso 10 & 11 o Novema, le NZ Final.
E toaiva i latou sa tauva faatasi mai itumalo eseese o Niu Sila. O loo i luga o le YouTube http://www.youtube.com/watch?v=B3Xz0dJRo9g le lauga a Ami na faia i lea tauvaga, ma e te molimauina ai le taliē ma le matuā faafiafiaina o le aofia i le taimi na lafolafo ai Ami, ona o le mālie o lana tala sa faamatala.
Sa tatau i sui tauva taitasi ona faia lana folasaga i totonu o le 5 i le 7 minute, ma e eseese lava autū sa auga i ai a latou tautalaga taitasi. O le matua o le lauga a Ami i le gagana Peretania, “What language do you speak?” Sa fua le togiina o le tauvaga i le anofale o le tautalaga, le faatulagaina ma le momoliga poo le kilivaina i le aufaalogologo.
O lē na manumalo mai le tauvaga tele lea, ua sauni nei e fai ma sui o Niu Sila atoa i le tauvaga faavaomalo (International). Peitai mo Ami, ua toe sauniuni atu nei mo le isi tauvaga tele a Aukilani e faia ia Mati o le tausaga fou 2013, e sue ai se sui o Aukilani mo le isi foi tauvaga tele a Niu Sila atoa i le 2013, e faia i Ueligitone ia Me.
O le tauvaga lea i le tausaga fou, e lē o se tauvaga mo lauga faamālie (Humorous Competition) e pei ona sa auai atu ai Ami i Hamilton 2012, ae o tauvaga nei e lua ia Mati ma Me o le 2013, o ni lauga e faagaeetia ma faaosofia ai lagona lelei (Inspirational and Motivational Speech Competition).
Afai ae manumalo i le tauvaga lauga i Aukilani ia Mati 2013, ona sauni ai lea mo le tauvaga faaiu i Ueligitone ia Me 2013, e saili ai loa se tasi e fai ma sui o Niu Sila aoao i le tauvaga faavaomalo 2013, (Inspirational and Motivational Speech Competition).
Ina ua fesiligia e le sui o le nusipepa le susuga Ami e tusa ai o le mafuaaga ua naunau ai i lenei tomai, na ia saunoa, o lona lava lea natura mai a o laitiiti, e fiafia e tautala pe tautala soo i se gagana faigofie.
Fai mai Ami, o le mea lena sa tele ina faasala ai o ia i lana vasega a o aoga i Samoa, o le tautala soo, ma le lilo i ona manatu, o le a toe faaeaina ai o ia i ni tausaga mulimuli ane e pei ona ua iai nei.
O lana uluai galuega ina ua taunuu i Niu Sila, sa faigaluega i falegaosimea (factory). Peitai e lei muta ai iinā lona faanaunauga e aapa pea mo nisi tomai e sili atu ona lelei, aemaise lava ina ia ausia ai ni galuega e feololo atu ni totogi.
O le taimi nei, o loo galue Ami i le polokalame tau a‘oa‘oga a le Martin Hautus lea e iai ona nofoaga i Magele ma Onehunga, i le veaga e a‘oa‘oina ma fesoasoani i le auaooga i tomai e sailia ai galuega (Work Broker), e ala i le faaleleia atili o le tautala i le va ma tagata; ia iloa le upu tonu e fai atu, le taimi tonu e tautala ai, ma le auala pito sili ona lelei e momoli ai.
O le moemitiga a Ami, ina ia avea o ia o se tasi na te kilivaina lauga o le a matuā faagaee ma sufia ai lagona o ni aufaalogologo, aemaise lava ona uso ma tuafafine Pasefika, ina ia latou talia ma faatino se feau o loo momoli atu i na lauga (To Become a Motivational Speaker for Pacific People).
