Uluai Palemia o Samoa ua valaaulia e le Palemia o Isaraelu

E agiga loa le igoa o le atunuu o Isaraelu ma taia ai le faalogo ma le faafofoga a soo se tagata Samoa, e muamua lava mafaufau i aoaoga kerisiano ma tala o le Tusi Paia o loo matamata tetele ai le tala o mea na tutupu i tagata Iutaia na auala mai ai le faaolataga o le lalolagi i le Alii Faaola o Iesu Keriso o se tagata Isaraelu ae sa iloa lea vaega o le lalolagi anamua o Iutaia.

O le nuu paia e pei ona lauiloa ai ona o nofoaga sa feafioai ai le alii Faaola i na ona po o lana misiona tala‘i mo le faafouina o le ola faaleagaga ma le talitonu i le Atua o Isaako o loo talitonu i ai le aukerisiano.

Ua faaalia e le Palemia lona faateia i le valaau faaaloalo a le Palemia o lea Malo e pei ona faailoa e lona amepasa.

O se avanoa na ia faaalia o le a mafai ona silasila ai i nisi o tala ma mau mai le Tusi Paia e pei o Isaraelu o tupuaga o le fanau a Isaako o loo nonofo i le mea o tafe ai le suasusu ma le meli ae o fanau a Isamaeli poo tagata Arapi o loo nonofo i eleele o iai le suauu.

O sootaga la vavalalata o Isaraelu ma Samoa e le tau  fesiligia ua tele tausaga i le tulaga faavaomalo.

E olaola le sootaga pe a oo ina lotea mataupu e aafia ai atunuu o le lalolagi i le lio o malo Aufaatasi e pei ona faaalia e le Amepasa o lea Malo mo Samoa, le alii o Shewi Tzur, o ia lea na ia tauaao i le alii Palemia o Samoa le tusi valaau faaaloalo mai le taitai o lona Malo ina ia asiasi atu i se tulaga taualoa (state visit) le taitai o le Malo Tutoatasi o Samoa.

O le faailogaina mo le taimi muamua i Samoa o le 64 tausaga o le Tutoatasi o lea Malo i Sasae tutotonu i lo tatou atunuu e pei ona iai se sauniga sa faia i le faletalimalo o Aggie Greys i Vaisigano i le afiafi o le Aso Lulu, 16 o Me 2012 na faailoa ai e le alii Amepasa ma le valaau faaaloalo a lo latou Palemia.

I se talanoaga faasamasamanoa ma le Amepasa i lea sauniga na ia ta‘ua ai sa fai si ona ofo tele e lei iai lava se malaga taualoa a se Palemia o Samoa i lona atunuu talu ona faavae ma amata sootaga faavaomalo, ma o le mafuaaga lea o le valaau faaaloalo a lo latou Palemia.

Fai mai le alii amepasa o Samoa o se atunuu laitiiti faapei o Isaraelu e ui e eseese i le tulaga o le toatele o tagata, peitai o le toafilemu o Samoa ma le lelei o ana pulega malo o le isi itu e tulaga ese ai lo tatou atunuu i lana vaai a o ia tauaveina le tofiga Amepasa o lona malo mo Samoa i le taiminei, lea sa amata lona taimi galue i le tausaga ua mavae 2011 ina ua mae‘a tauaao ona tusi tofiga i le afioga i le Ao o le Malo.

 

Talia e Tuilaepa le valaaulia

O le saunoaga a le taitai o le Malo i le alii Palemia, e tali fuaitau i le saunoaga a le Amepasa, na faailoa ai lona faafetaia o Isaraelu i fesoasoani o loo aumai mo Samoa aemaise o sootaga mafanafana faaleva-o-malo o loo auala mai ai nisi fesoasoani. O le tasi o fesoasoani sa tauaao a o iai le alii amepasa i Samoa, o mea taalo mo le faalapotopotoga o le taaloga soka i le atunuu, e pei o seevae taalo ma ofu ma isi totoga e tusa lo latou tau atoa ma le luaselauafe tala Samoa.

Sa foai foi e lea Malo ni vailaau mo le togafitia o le gasegase o le suka mo le Matagaluega o le soifua maloloina. Faaalia e Tuilaepa i lana saunoaga, o se taimi o Novema o le tausaga nei o le a fuafua e malaga ai mo lana asiasiga taualoa i Isaraelu. O ia foi le Palemia muamua o Samoa o le a malaga mo se asisiga faalemalo talu ona tutoatasi lo tatou atunuu.

O le afioga i le Ao o le Malo ua tuumalo, Susuga MalietoaTanumafili II na muai avea ma uluai Ao o se malo i le lalolagi na afea le nuupaia i Isaraelu i se malaga taualoa e ala i sevalaaulia a le pulega o le Faatuatuaga Bahai i le lalolagi o lonanofoagatutotonu o loo i le aai o Haifa i Isaraelu lea o loo tautua ma galulue ai nisi o tamafanau a Samoa o loo auai i le faatuatuaga.