O le auna lava ma le faamoemoe ola o soo se mafutaga tuufaatasia a se aiga (Family Reunion), o le faatāuaina lea o alo ma fanau lalovaoa ina ia faafeiloai, fefaavaaia‘i, fefaamasania‘i ma ia totō ai le fatu i le ola fealofani aemaise lava ia soifua malamalama le tasi i le isi ma ia silafia le tupuaga ma sootaga i faiā auā le soifuaga agai i luma, ina ia aua nei afaina i le fenofona‘i po o le soifua lē mautinoa i le sootaga ma aiga.
O le autū foi lea ma le faavaeina o le mafutaga ua amatina nei a alo o le Afioga Tuigamala Malama Talataina ma le tina ia Ala Sagapolutele Talataina.
O i latou na afua mai i tuaa ua faiilagi le folauga o loo totoe mai poo toe ulutaia o le aiga, o le afioga Talataina Nofo ma lona tuafafine o Uimaitua Tuigamala Talataina o loo aumau i Niu Sila nei, aemaise foi le afioga Talataina Ese o loo aumau i Tutuila ua lē mafai ona lava mai i le mafutaga, mai alalafaga o Ulutogia Aleipata ma Saanapu i Safata.
E tolu aso o lenei mafutaga i le nofoaga-tolauapi i Blockhousebay, ma na amataina i le Aso Faraile.
O le Susuga i le faatonu toeaina, Laau Ioritana Tanielu sa na tatalaina aloaia lo latou faamoemoe i se sauniga lotu na faafetaia ai le Atua, ina ua faatanuuina manuia lenei mafutaga ma le faamoemoe e toe fuafuaina le isi mafutaga mo le tausaga fou ina ia mafai ona auai uma mai i ai i latou na lē mafai ona paau mai i lenei tausaga ona o nisi foi o tuatuano‘a. O le toatele foi o nisi o le aiga sa faimalaga mai vaega eseese o le lalolagi e pei o nisi na autovaa mai Tutuila, pei o le afioga i le Sa‘o o le aiga, Talataina Valusia ma le faletua ma le fanau, o nisi mai Samoa, Ausetalia, Hawaii aemiase i latou o loo aumau i isi vaega o Aotearoa ma Aukilani nei.
O lenei tolauapi sa faapolokalameina ma tapenaina lelei ina ia maua e le aiga atoa le fiafia e mafuta ma auai e faatino a latou fuafuaga e pei o taaloga, faaaliga taleni i faafiafiaga faalelotu ma isi, ae na sili foi ona faatāua le faasoa saoloto a le fanau i soo se mea e tusa ma polokalame faataatia sa feagai ai.
