O lenei mafutaga a tina Samoa, Sini i Sisifo, ua faaigoaina ma lesitalaina o le Australian Samoan Women’s Group, ma e tutoatsi, pe, e lē o i lalo o se faamalumaluga a se isi faalapotopotoga.
O lenei mafutaga o loo faatautaia lea i le nofoaga o le W.A.S.H House, i le aai o Mt Druitt i Sini i Sisifo, i Aso Lulu taitasi mai le sefulu i le taeao seia oo i le tasi i le aoauli.
Na amataina a latou atinae poo polokalame faatulagaina i le aso 22 o Me 2010, ae faato‘ā tatalaina aloaia i le aso 30 Novema i le tausaga lava lea, i le nofoaga a le Ekalesia Toga, o le Pulelahaa.
Na auai faapitoa ai le sui o le palemene mai Chifley, le afioga ia Ed Husic ma sui togia mai le Multicultural Services.
Na maualuga foi lena faamoemoe ona o le lagolagosua mai a faafeagaiga mai fata faitaulaga eseese mai le itumalo o Sini i Sisifo. Sa auai atu faafeagaiga nei, Kilifi Luteru (EFKS Rooty Hill), Tom Meredith (Whalan Au-Uso), Pati Lauvi & Sianini Vaafusuaga (Worship Centres). Ae na ave le faaaloalo i ē e ona laueleele poo le faafeagaiga mai le Ekalesia Apoliki Penrith, e na te faapaiaina le sauniga, le susuga ia John Armstrong.
E sefulu ma le ono tina na auai i le uluai polokalame, ae ua oo atu nei le fuainumera i le luasefulu ma le lima.
O le auga ma le autū o lenei mafutaga e faapea, “a loto gatasi, e maopoopo, ae a felotoa‘i, e malepelepe.”
Ua ala ona a‘e se tofa poo ni manatu ina ia latou amatamea, ona o itu nei, poo ni a latou miti taulai.
E moni, o tamā o faauluuluga ia o aiga, ae a lē fautua lelei le tina, e lē maopoopo se fanau poo le lotoifale.
O nei polokalame, o se taumafaiga lava ia atina‘e itu nei. Ia toe faaleleia atili o latou aiga, e ala atu i a‘oa‘oga e maua mai ai ni tusipasi ma se tovaa mo ni pisinisi e fia faia ma ni avanoa faigaluega.
E lē gata i lea, ae o se mafutaga e faamalosiau ai le isi i le tasi, e maua ai foi ni fautuaga lelei mo ni faafitauli faaleaiga.
O le soifua maloloina poo le nofo lapataia i taumafa e lelei mo le tino ma le mafaufau, o le toleni faamalositino, o aiā tatau a tina, mataupu tau mapusaga o aiga, o mea su‘isu‘i, o mea taulima faa-Samoa e pei la o le faiga o kiki fulumoa, tuiga ma le eleiina o laei.
Ua mae‘a ni fesootaiga a lenei mafutaga ma le T.A.F.E i Mt Druitt, auā ni a‘oa‘oga mo lenei tausaga.
O le vaiaso fou, i le Aso Tofi, 10 Fepuari, i le ‘afa o le iva i le ‘afa o le sefulu lua i le aoauli, o le a amata ai aoga faakomipiuta, e faatautaia e le faiaoga mai le T.A.F.E, o Jill Margrill. E faia lea, i W.A.S.H. House i Mt Druitt.
O nisi polokalame mo Fepuari, o le a suisui o loo faatautaia e le tina Samoa o Faaseu Jane Sarader, o le faatulagaina o fugalaau, o le gagana faa- Peretania, aemaise le faamamafa atu i le soifua maloloina i mataupu tau tina.
O le susuga ia Europa Fauoo-Faapoi, o ia o le Bilingual Community Educator, o loo faaavanoaina lona taimi e faamaopoopo ai nei polokalame.
O lenei alo o le atunuu mai alalafaga o Fagaloa ma Nofoalii, ua lava sauni lona a‘oa‘oina ma le tomai, auā le faatautaia o mataupu tau soifua maloloina.
O se tamaitai fomai pasi mai Samoa, Niu Sila ma Ausetalia nei, e pei ona sa galue ai foi i le falemai i Bankstown.
Ae o sona taofi e faapea, “e sili atu le tāua ma lo‘u fiafia ou te tautua mo o‘u tagatānuu, auā ou te iloaina a faatautaia polokalame i la‘u lava gagana, e tele nisi e auai. O so‘u sao lea mo Samoa”.
O le uluai laulau a ofisa,
Peresitene: Alofa Mataupu;
Sui peresitene: Agaimalo Samoauatasi; Failautusi: Rasela Sefo;
Sui failautusi: Lela Tovia;
Teutupe: Atele Liolevave;
Sui teutupe: Solema Lavea;
Sooupu: Aiulu Piilua.
E maitauina le galue taumafai o le tina ia Eseta Mauga, e ui ina ua valusefulu ma le ono tausaga o lona soifua, ae o loo tau atina‘e pea lona lumanai.
Manaia foi sia tina, e fai ma faataitaiga lelei, mo i tatou tina laiti, o loo ola faalagolago i le suamalie o le penefiti ma le tupe a tamaiti, ae tua i le misa soo ona o le lē lava o le faasoa.
Ia talosia ia le alofa o le Atua, e taiala i polokalame faataatia a le uluai mafutaga tina Samoa, i Sini i Sisifo.
