Uluai Leoleo Samoa ua maua faailoga taualoa

I le tele o tausaga o le tautua a le matagaluega o leoleo ma falepuipui i le tuanai o le tutoatasi muamua o le atunuu i le tausaga e 1962, lea ua silia i le limasefulu tausaga, ua faia le filifiliga a le faalapotopotoga o taitai sili o auaunaga faaleoleo i le Pasefika le Pacific Islands Chief of Police, e tuuina atu i se alii leoleo sinia o le Malo o Samoa le faailoga taualoa pito maualuga ona o le maoae o lona tomai faaleoleo i galuega tau i suesuega faapitoa lea e ta‘ua i le gagana peletania o le Forensic Expert.
O le taimi muamua lenei ua faaeaina ai se Malu o le Malo o Samoa i lea faailoga maualuga e pei ona maua e le faauluuluga o le ofisa o le matagaluega o loo nafa ma suesuega faapitoa le Forensic Department, lea e suesueina ai tulagalima o ni solitulafono e molia ai nisi, le afioga Tagaloa Tipasa Matamu o loo umia le tulaga faaleoleo o le superenetene. O le vaiaso nei na feiloai ai le minisita o le matagaluega le afioga Sala Fata Pinati ma tauaao ai lona faailoga, ona e lei avanoa o ia mo le tauaaoina o le faailoga i le fono a komesina o leoleo o le Pasefika. Ua faaalia e Tagaloa Tipasa lona faagaeetia ona o le filifiliga ua na maua ai lea faailoga ma o se faaeaea mo le matagaluega ma Samoa aemaise o se isi lea o pine faamau o lona olaga auauna faaleoleo i le tele o tausaga.
Na amata galue o ia i le matagaluega o leoleo a o avea le afioga Saunoamaalii Sonny Schuster ma Komesina o se tasi e faia galuega i le ofisa, poo office boy i se tulaga lē tumau a o iai pea o ia i aoaoga i le Kolisi o Samoa. O le mae‘a o ana aoaoga na ia naunau ai pea e faaauau lona olaga tautua i le galuega faaleoleo lea na galue mai ai lava seia oo mai i le taimi nei ua ia umia le tulaga faaleoleo o le Superenetene. O le ofisa lava o leoleo e suesueina tulagalima ma suesueina ata pue o vaaiga o se nofoaga e tupu ai se solitulafono na galue ai o ia lea ua tele tausaga o auauna ai pea e oo mai i le taimi nei.
O le faamatalaga a Tagaloa o se galuega e sili ona faamemelo i ai ma o le pine faamau o loo auauna ai pea. O lona faletua o se tasi foi o taitai leoleo o loo galue nei i le vaega o auaunaga lautele le general policing i le ofisa autū i Apia. O ia o se tasi o alii leoleo sinia ua iai tomai faapitoa e suesueina ai ata ma tulagalima faapea vaaiga o se nofoaga na faia ai se solitulafono lea e masani ona valaauina o se molimau i le faamasinoga e faamatala ia vaega uma pe a suesueina se solitulafono mamafa ma matuia.
O ia o se alo e faasino i se tasi o tamalii sa galue foi o se taitai leoleo ua tuumalo le susuga Faaopoopo Matamu mai le afioaga o Fagalii.