O le tausaga 2014 na amata faatalatalanoaina ai e le susuga i le faafeagaiga ia Rev Dr Ieti Mageo ma le susuga i le faafeagaiga ia Rev Dr Benjamin William le Agape International Ministries e avea o se faamalu. Ua fa nei tausaga talu ona faatalanoaina le faamautuina o le faavae o le ekalesia o le faamoemoe autu, ina ia avea o se faamalu mautu ma mausaili i le soifua galulue ma le soifua auauna o tagata i le Atua. O le tausaga lenei o le uluai koneferenisi lea a le Agape International Ministries i totonu o Niu Sila, ma sa malaga uma mai ai ekalesia e 40 o loo ua iai nei i le lalolagi, e aofia ai Amerika, Hawaii, Alaska, Ausetalia, Niu Sila ma Samoa. O le faanaunautaiga a le ekalesia e tusa ai ma lana mataupu silisili, ina ia mafai ona faafoi le ekalesia e faaaogā auauna e lima i totonu o le lotu o loo ta’ua mai i le Tusi Paia, e pei o le perofeta, aposetolo, faiaoga, faievagelia ma le faifeau.
O le susuga i le alii fomai ia Dr Ieti Mageo faapea le susuga i le fomai ia Dr Benjamin William o i laua ia sa tau amataina mai lenei galuega ma tau saili ni ekalesia, aemaise o ni Aoga Tusi Paia ina ia mafai ona aoaoina ai tagata lolotu auā le faaaogāina o lo latou soifua i totonu o ekalesia o loo galulue ai. I le taimi nei o lea foi ua mautu lea vaega o le galuega, e pei ona iai Aoga Tusi Paia e 12 ua faaigoaina o le Ia Malamalama Agape Bible College o loo iai nei i Ausetalia ma Niu Sila, ese mai ai i isi aoga Tusi Paia o loo iai i isi tafa o le kelope.
O le mae’a ai o le fonotaga a le ekalesia i lenei tausaga ma ua faamautu ai ona filifilia o ana komiti faafoe e taitaiina le galuega a le Atua. O le susuga i le fomai ia Rev Dr Ieti Mageo ma lona faletua ia Palepa Mageo ua filifilia nei e avea ma peresetene aoao o le ekalesia i le lalolagi, ma o laua foi ua gafa ma le vaaia o ekalesia o loo Hawaii, Amerika, Alaska ma le agai atu i Samoa, o Rev Dr Benjamin William ma lona faletua ia Simotu William ua tofia e fai ma sui peresitene aoao o le ekalesia, faatasi ai ma le vaaiga o ekalesia uma o loo i Niu Sila nei, ae o le susuga i le faafeagaiga ia Rev Dr Seuga Aumua ma le faletua ia Maliliga Aumua ua filifilia e avea ma fautua aoao o le faamalu, faapea ma le vaaiga poo le taitaiina o ekalesia uma o loo i Ausetalia.
O le manulauti na faaautu iai le mafutaga, “O le malo o le Atua ua lata mai” poo le malo o le Atua ua iai iinei. O le tumutumuga lea sa faautu uma iai semina sa faagasolo, faapea le laugaina o le upu a le Atua i po sa faatinoina ai sauniga faatasi ai ma aitema a autalavou ma ekalesia sa fai o latou sao i lenei koneferenisi. O le faalauteleina o lea manulauti, ia faailoa pea i tagata upu a Iesu, e le o iina e le o iinei ae o le malo o le Atua o loo i totonu ia i tatou.
O nisi vaega tāua na faamalosia i semina sa faatinoina e le susuga i le fomai ia Dr Benjamin William o le toe faapupula lea i tagata o le ekalesia o le ola tapuai i le Atua. O le fomai ia Dr Seuga Aumua, na ia talanoaina le tāua o le Agaga Paia, ma le papatisoga o le Agaga Paia faapea ma meaalofa o le Agaga Paia, o le mana lea o le malo o le Atua, na te faagaioia ma faatautaia mea uma o le malo.
E fa aso na faagasolo ai lenei fonotaga tele lea sa tumutumu ai ekalesia e 40 mai itu eseese o le laolagi i Niu Sila nei. O le town hall i Papatoetoe sa usuia ai lenei mafutaga, ma o se faamoemoe na iloga ona maua uma ai e tagata le olioli o le Alii faapea faamanuiaga faaleagaga mai afioga Paia a le Atua.
O le Aso Gafua na tatala aloia ai le mafutaga ma faailoa ai atunuu eseese o le lalolagi o loo iai i le faamalu a le Agape International Ministries ma o le faafeiloaiga foi lea o le koneferenisi. O le Aso Lua na amata faasolo ai loa atunuu e faatinoina polokalame i sauniga i taeao ma sauniga i afiafi, lea sa amataina e Amerika ma Alaska i le po o le Aso Lua. O le Aso Lulu na galulue ai Ausetalia, ma le Aso Tofi o Samoa ma Hawaii, o Niu Sila lea sa talimalo i lenei faalagamaea muamua o le ekalesia.
O le po o le Aso Faraile na faamae’a ai loa le mafutaga, i le faauuina lea o tofi o le ekalesia e ala i tofiga o le Komiti Faafoe, faapea susuga i faafeagaiga faauu, o faifeau laisene faapea ma a’oa’o ma tiakono, ma ua sauni foi le ekalesia e faaaogāina loa ona tofiga nei i totonu o le galuega.
O le mafutaga e lei faigofie ona faauma ma faamae’a auā ua ulutino le galuega a le Agaga Paia i loto ma agaga o tagata, ma ua fusia foi tagata uma i le alofa e tasi ma le olioli o le Atua, ma ua avea ai lava ekalesia uma ma aiga e tasi. O faamanuiaga a le Komiti Faafoe ia avea lenei uluai fonotaga i Aotearoa e fai ma luitau mo tagata uma o le Agape International Ministries o loo iai i atunuu eseese o le lalolagi. Ia ia te outou le manuia o le Atua le Tamā le Alo ma la Agaga Paia.
