Uluai faauuga a le Puna o le Atamai Aoga Amata mo lenei tausaga

E toaono le fanau laiti na faauu mai le faauuga a le Puna o le Atamai Aoga Amata, aoga sa faia i le Aso Faraile, aso 28 Iuni 2013 i le hall a le Ekalesia a Word of Life i Otahuhu.
E masani ona faatoa faia faauuga i le faaiuga o le tausaga, peitai o le faauuga i lenei ogatotonu o le tausaga ua faia mo nisi o le fanauiti ua tatau ona see atu i le isi laasaga tau aoaoga.
O igoa o nai tamaiti sa faauu o Eteleina Mataia, Asoiva Fretton, Lennyx Ah-Toon Hotene, Brayson Pou, Campbell Lui ma Angelo Vaafusuaga.
O le Aoga lenei a Puna o le Atamai Aoga Amata na faavaeina e le Afioga ia Tofilau Malelega i le tausaga 2000.
O le taimi nei ua lua aoga ua faavaeina e lenei foi tamalii o le atunuu le afioga ia Tofilau Malelega, o le aoga lenei o Puna o le Atamai Aoga Amata o loo iai nei i le Southern Cross Campus i le 29 Wickman Way i Mangere ma le tasi ana aoga fou o loo faaigoaina i lona suafa o LE MALELEGA A LE TOELAU AOGA AMATA i le 40 Cleek Road, Mangere.
O lona alo tamaitai o Meritiana Lolesio o ia lea ua tuuina atu i ai e le afioga ia Tofilau Malelega le tauaveina o nei aoga e lua faatasi ai ma le galulue faatasi ma isi ona alo e toalua o David Vaafusuaga ma Faye Deet.
O Puna o le Atamai Aoga Amata e toafā (4) Qualified Teachers ma o nei faiaoga faauu, na faauu uma mai i le Auckland University Faculty.
O latou igoa nei, o Gaseilevao Loia (supervisor), May Falaniko, Priscilla Purcell ma Sauoalofi Rose Faaua Sia.
O le aofai o tamaiti o Puna o le Atamai e 38 tamaiti, e tasi le teacher aide ma le administrator.
O taimi amata o lenei aoga o le 8.00am seia oo i le 5.00pm. E talia lava soo se tamaitiiti mai le lua tausaga e oo i le fā tausaga.
O le Curriculum lava e tasi o loo faaaogāina i aoga faata‘ita‘i uma i Niu Sila nei e oo lava i aoga Mainstreams o le Curriculum lena o loo faaaogāina i lenei aoga.
E matuā selau pasene le lagolago a mātua o lenei aoga, o le mea lea e momoli ai le faafetai a le komiti o mātua ma le mamalu lautele o mātua o lenei aoga o le Puna o le Atamai Aoga Amata, e tusa ai ma le latou lagolago malosi i soo se mea e faia a lenei aoga.
O lenei lava aoga e fiafia foi e lagolago i soo se meafai e aogā mo le komiuniti, e pei ona sa auai atu foi i le tauvaga maukeni sa fai a le Radio Samoa ma le Samoa Times. Na maua ai foi le latou faailoga ina ua manumalo i le maukeni e sili ona laititi, ma ua moni ai le upu, “E laititi ae ma‘ini.”