Uluai faatasiga PASIMA ma tagata faasalalau o le Pasefika

Ua tolu tausaga talu ona faavae le faalapotopotoga fou o tagata tusitala ma le au faasalalau a le pasefika ua faaigoaina o le PASIMA, ae o le fono a le komiti faafoe na usuia i Samoa ile masina nei, na faia ai le faaiuga ua tatau ona talo se fono faalauaitele a le faalapotopotoga.

O le faaiuga o Aukuso agai ile amataga o Setema o le tausaga fou 2013 ua faatulaga e faia ai lea fono tele i Samoa, o le a tatala ai le avanoa i soo se faalapotopotoga tau faasalalauga, o televise, nusipepa ma leitio aemaise o faasalalauga e faaaoga ai fesootaiga televavave i luga o masini komipiuta ina ia auai ile faatasiga. Faaalia e le komiti faafoe o se avanoa e fesiligia ai taitai o le PASIMA ile fuafuaga alualu mamao mo le atinaeina ma le siitia o le tomai o tagata tusitala ma le au faasalalau tala ile pasefika.

O le avanoa foi lea e mafai ona silafia ai e nisi o le a malaga mai i Samoa mo le fonotaga fuafuaga a le faalapotopotoga mo le faamausaliina pea o le saolotoga e faia ai le galuega faatusitala ma faasalalau e aunoa ma le aiaina ini malosiaga tau polokiki poo nisi taumafaiga a tagata taitoatasi.

O le fono sa usuia ile masina nei i samoa a le komiti faafoe sa folasia ai le polokalame ua faataoto mo le aoaoina o tusitala galulue ile tomai e suesueina ai ni mataupu e faasino io faiga faaalatua ma faiga piopio e le gata o totonu o faigamalo ae o faalapotopotoga tumaoti o loo faatupe i fesoasoani mai isi tagata ma malo i fafo ma faalapotopotoga.

O se tasi lea o sini o fuafuaga faavae a le PASIMA ina ua faatuina ile tausaga e 2010 i Samoa, ia mafai ona aoaoina lelei tusitala, ma ia faaaupega i tomai e faatino ai ni suesuega (investigative reporting).

O se alii mai Solomona, o David Leamy o loo gafa ma le faataotoina o le aoaoga ise faiga e fesootai ai i luga o upega tafailagi (website) e faatino ai le aoaoga. O loo fuafua e totogi e tusitala le aoaoga pe a fia auai ma e lei faamautina pe fia le pili e totogi.  O le faatuina o le faalapotopotoga na mafua ina ua le mafai e le isi faalapotopotoga o tagata tusitala a le pasefika le PINA, ona tetee faiga faamatau ile saolotoga o tagata tusitala i Fiti ona o pulegamalo faafitafita a lea atunuu ile tausaga e 2006 na fouvaleina ai le malo faatempokarasi o Fiti. Ua iai le lagona o le taitaifono ma le komiti faafoe, e le aiaina e le PASIMA le pulega o le PINA ae o le mea sili ona taua ia faatumauina pea le saolotoga e faia ai le galuega i atunuu uma o le pasefika o le sini lea o taumafaiga uma o loo pulea ai nei faalapotopotoga tumaoti e lua.