E toatele o le a lē talitonu pe a faafofoga i pese o le CD fou a Kiri, o le faapuupuuga o lona suafa moni o Kirisome mai Samoa, ua tele tausaga o pese i faaili i Samoa ma faaauau mai ai i Niu Sila.
O lona siufofoga o se tamaitai moni lava pe a lagi mai se pese Samoa poo se pese faaperetania ma o lana faamatalaga lea ina ua fesiligia i sona lagona pe afai e iloa ane e tagata o ia o se tama tane. “Ioe ou te iloa o le a faigata i le toatele ona talitonu o a‘u o se alii pe a oo nei ina faasalalau a‘u fatuga i luga o leitio i Niu Sila ma Samoa pe faatau foi se CD e faafofoga i ai”, o le faamatalaga lea a Kiri i se talanoaga a o iai le tusitala i Niu Sila i le vaiaso a o lumanai le tausaga fou 2011.
“O la‘u taleni o le musika aemaise i le pese na amata mai ina ua ou manumalo i le tauvaga pese sa faia i le William’s Bay le fale kalapu sa i Fugalei, faapea ma le faaili a le Tropicana i Fugalei sa matou pepese ai ma se isi alii pese lauiloa, le susuga Fonotele Levi”.
O lana CD pese fou ua faaigoaina ia “Tinā” e aualofa ai i lona tina o Luatapulei ua fai i lagi lana folauga. “Ua ou misia lava si o‘u tina auā e sau le logo ua amia e lona matai, o lea ua ou nofomau i Niu Sila ma se vaega toatele o lo matou auaiga e aofia ai nai o‘u uso ma o latou taitoalua ma fanau”.
O le tamaitai pese e pei ona valaau ai e le toatele o ana uo ma ana paaga i le taleni o le musika, sa soifua mai i ona mātua o Tuaoimaalii Semaia Emau le tamā, ae o Luatapulei Magele le tina mai afioaga o Vailoa i Faleata ma Iva i Faasaleleaga i Savaii.
O le aufaipese a lana EFKS i Vailoa-uta Faleata na amata ai ona koleni le leo o Kiri, ae o le tauvaga pese sa faia i le William’s Bay i Fugalei na manumalo ai i le tulaga muamua. Sa tausinio foi i le tauvaga pese sa faia i le faletalimalo o le CandleLight i Tanugamanono ae sa manumalo ai le isi faafafine pese o Blonde. Na sosoo ma le talia o Kiri e le pulega o le fale kalalapu o le Tropicana e avea ma se tasi o ana tagata pese autū poo le lead singer lea sa galue ai mai le tausaga e 2002 i le 2005.
O le faaiuga o le tausaga e 2005 na malaga mai ai loa i Niu Sila ma aumau ai e oo mai i le taimi nei, lea sa valaaulia ai foi e nisi o faaili e faaaogā lana taleni pese mo i latou e pei o le faaili o le Evaeva Band ma le Lili o le Vao Band o loo tautua ai i le taimi nei. Sa faafiafia foi ma nisi o tagata pepese lauiloa o Samoa e pei o Tolumaanave Misiluki Su‘a, Sia Su‘a, Reno ma Mautoatasi Asuao, ma nisi foi o koneseti pese sa faia i Aotearoa nei.
O le po o le Aso Toonai o le vaiaso nei, 15 o Ianuari 2011 o le a faalauiloa ai le uluai CD pese a Kiri i le 10 High St, Community Hall Otahuhu i Aukilani ae o se taimi lava o le masina nei o le a faalauiloa ai foi i Samoa.
E faato‘ā talitonu Toma ina ua vaai ma faalogo, ma o le fautuaga lea mai le tamaitai pese mo i latou e fia faafofoga ma fia silafia atili ana fatuga o pese Samoa.
