Uluai CD a le Ekalesia Harvest Worship Centre Christian Church i Logan City

O le auaunaga i le Atua, e lē o se mea e faatemutemu sona faiga. A lagona le fiafia e galue, e tatala lava e le Atua faitotoa ma punāvai o manuia e sasaa mai.

O le  tasi foi o le loto, e maopoopo ai ma māmā se avega.

O le molimau maumaututū ma le tautinoga mautinoa, na mafua ona tino mai lenei faamoemoe ona o le faatasi mai o le Agaga Paia o le Atua.

I se saunoaga foi a le susuga ia Ps Anthony Mauinatu (faafeagaiga) e faapea o lenei CD o se poloketi na aumaia e le Atua i se faaaliga (vision) e ao ona faatinona e le Worship Team i le 2 tausaga talu ai, ma sa faatali lava i le taimi a le Atua e faataunuuina ai, e ui i se naunau ina ia vave.

Ua lē gata o se molimau ola foi i le galuega a le Atua e pei ona galulue ai lenei vaega o le ekalesia, ae i le manatu faaletagata lava ia, e faigata ona faataunuuina ona e tele faigata o poloketi faapenei.

O le agaga fiafia i lona faatinoina, e moni lava le Afioga a le Atua i le Filipi 4:13, “E mafaia mea uma i le faatasi mai o le Keriso”.

O le ala foi lea ua faaigoaina ai lenei CD “E Mafaia Mea Uma i le Faatasi Mai o le Alii”. O le CD foi o se isi lea o laasaga ua mafai ona ausia e lenei Ekalesia Harvest Worship Centre Christian Church-Logan City ua faatinoina i le atoaga o le 5 tausaga talu ona faavaeina e le Atua le Ekalesia.

O le igoa o le Aufaipese o le “HARVEST VOICE OF PRAISE TEAM” ma o le faletua ia Sandy Savaliga sa feagai ma le faatautaia o lenei poloketi.

O pesega i lenei CD o ni viiga na lagiina ma tusia lava i totonu e le Ekalesia  ma le Aufaipese e ala mai i lauga ma feau eseese mai le Atua mo lana Ekalesia i Aso Sa taitasi.

O le Aso Toonai, aso 30 o Oketopa, sa tatalaina aloaia ai lenei CD i le ta o le 12 i le aoauli o le aso lava lea.

Sa vaaia le lagolago a nisi o aulotu a le Worship Centre faatasi ai ma uo ma tauaiga o le ekalesia.

E 12 pese o le CD – e 6 pese e tusia lava i le gagana faa-Samoa ma le isi 6 e faa-Peretania. O le faamoemoe autū o lenei CD ia  faateleina ai pea se viiga o le Atua ma momoli atu ai le Feau o le Talalelei mo soo se tagata mafatia ma fia maua se fesoasoani i lenei lalolagi.

O loo molimoli atu ai foi le agaga alofa o le susuga i le faafeagaiga ia Ps Anthony Mauinatu ma le faletua ma le aiga faapea le ekalesia, i le susuga i le Tamā Taitai o le Worship Centre i le Lalolagi atoa, susuga ia Viliamu Mafoe ma le faletua ia Lavina Mafoe mo le atoaga o le ta‘i 53 tausaga o o la soifua i le masina ua tuanai atu, faapea ekalesia uma a le Harvest Worship Centre Christian Church i le lalolagi atoa.