O se tausaga fiafia lenei mo tina uma o le ekalesia e pei ona ta‘ua i luga, ona talu ai e le gata ina ua aulia lo latou aso faapitoa e pei ona faamanatuina i lenei tausaga, ae o le uluai Aso Sa foi lea mo tina ua faamanatu i totonu o le aulotu, talu ona amata lenei galuega fou i Magele. O le saunoaga manino lea a le susuga i le Faafeagaiga o le ekalesia, le susuga ia Pastor Tama‘ifuga Talafu Petelo Sai‘a.
Sa fai mea fiafia uma fanau ma aiga o le aulotu, ona ua mafai ona faatinoina vaega taitasi sa faapitoa lava mo tina o le Ekalesia. Ina ua faato‘ā mae‘a foi ona aloaia ma faatuina le ekalesia a le God of Victory Chrisitian Church i lona nofoaga i Magele.
O le aso 22 o Aperila o le tausaga nei lava, na aloaia ai le galuega e pei ona taitaia e le susuga ia Pastor Tama‘ifuga Talafu Petelo Sai‘a, ma le faletua ia Vaaiga Sai‘a. E sefulu matafale ua faavaeina ai le ekalesia ma le galuega e pei ona faamaonia mai e le susuga i le Faafeagaiga.
O se avanoa ua faaauau ai le agaga fiafia o le susuga i le auauna a le Atua ma lona faletua, ona o le uluai Aso Sa o Tina lenei a le aulotu, ma faafetaia ai foi matafale uma e sefulu mo le lagolagosua, e le gata mo tina ma lo latou aso faapitoa, ae o isi foi vaega taitasi mo le fausia o le tino o Keriso i matata eseese.
O se fiafiaga tele foi lea i lenei Ekalesia, ona o lea ua mae‘a ona lesitalaina faaletulafono i totonu o le Malo o Niu Sila.
O le faafetai a le Faafeagaiga ma le faletua, e faapitoa mo matafale uma nei o le ekaleisa: (1) Afioga ia Taito Simi Tupuola, le faletua & aiga; (2) Afioga ia Taiivao Faalavaau Avea & aiga; (3) Fetalaiga Ulugia Sio Poleka, le tausi & nofoaalo; (4) Fetalaiga Ailōlō Faasipa, le tausi & nofoaalo; (5) Fetalaiga Mapu Simeti, le tausi & nofoaalo; (6) Fetalaiga Vaamanū Samuelu, le tausi ia Laalaai & nofoaalo; (7) Susuga Pafuti, faletua ia Valuese & nofoaalo; (8) Susuga Silao, faletua ia Maria & nofoaalo; (9) Tina matua ia Mati Fitu & nofoaalo; (10) Tina ia Punipuao & nofoaalo.
