Uli ma sao le faamoemoe o le tauvaga pese o viiga o le Atua

Ua mae‘a le faamoemoe na gapatia ai aufaipese e fitu auā le faamaualugaina o viiga o le Atua e pei ona lagolagoina e le faletaavale a le Primoz Motors ae faatautaia e le Penina o Asuisui faatasi ma le lagolago a le aufaipisinisi.
Tulaga muamua na tutusa ai aufaipese e toalua o le EFKS Southwest Brisbane i Willawong ($1500.00) ma le Aufaipese a le Ekalesia Metotisi Logan City a le Faasinoti ($1500.00). O le tulaga lua na mauaina e le aufaipese ekalesia Metotisi a Akesa faasinoti a Kuiniselani ($2000.00).
O le tulaga tolu na faamanuiaina ai le aufaipese a le Uniting Church a Goodna ($1000.00) lea na tatalaina le latou CD i le Aso Toonai; tulaga fā na see mai i ai le aufaipese a le Uniting Church a Sunnybank ($500.00); tulaga lima o le aufaipese Samoa Saili Malo i Ipswich ($400.00) ma le tulaga ono na mauaina e le aufaipese Ekalesia Uesiliana Metotisi Ausetalia a Inala ($300.00).
E lē mafaamatalaina le maoae o tapenaga a aufaipese uma na alo i ai ekalesia nei ua mafai foi ona faafofoga le atunuu i taleni aemaise o i latou sa auai. Viia le Atua!
O faamasino o le tauvaga o le susuga ia Taito Eddie Tuiavii na malaga mai Niu Sila o se talavou e iloga foi ona tulaga ua 15 tausaga lona tomai faatapiano, maua lona faailoga o le Master of Public Policy in Educational and Politics Studies ma le tele o isi ona tomai faamusika; faapea le tofa ia Fagafua Ioane Masei malaga mai Melepone, e amata mai lana taleni i le 1980, Music Diploma Skills, tele aufaipese a le Ekalesia Katoliko o loo avea ai o ia ma faipese toe tasi le tausaga o lona Civil Engineer.
O scrutinizers o le afioga ia Tauiliili Peseta Ata Malifa o se tamalii lauiloa sa avea ma Faatonu o le leitio Siufofoga o le Laumua, galue i le ofisa o vaalele La Valise Travel & Naenae Travel o loo avea ma Faatonu o le polokalame Samoa i le alaleo 98.1FM i Brisbane, tuufaatasia le aufaipese a le Salanoa Band ma le Taui o Measina ma le faletua ia Susana Meleiseā 3 tausaga Peresetene Primary Ipswich Ward ekalesia a Iesu Keriso o le Au Paia o Aso e gata ai ma Faamasino – Tauiliili Malifa, Taito Eddie, Fagafua John, Susana ma MC o le po, o Terry & Rosa e galulue i le Penina o Asuisui sa faamaopoopoina togi.
O le Fuesaina Family sa tovaina le tele o aufaipese faatasi ai ma le Ipswich Sisdac Youth, Inala Sisdac Youth, Fauea Family ma le tamaitai  o Shavanna Sione. Momoli tele atu le faamalo i aufaipese sa tauva aemaise o le paia ma le mamalu o le atunuu e lata i le afe i latou sa molimauina lenei faamoemoe tāua sa faataunuuina i le Hope Church i Willawong. Faafoi pea le viiga o le Atua!
E momoli tele atu foi le agaga faafetai i le tofa ia Poulava Sam ma le tausi ia Lorna o le Uncle Sams Takeaway faapea Chris Tuia o le Digicel mo le taumafataga matagofie na mae‘a tapenaina.