E 21 faipule na palota e faamuta le tofi Peresetene o Faamasinoga o Fanua ma suafa le afioga Fepuleai Attila Ropati, ae na tetee iai le toa sefulu valu o sui o le palemene e aofia ai Minisita e toalua ma minisita lagolago e toalima. 

O Minisita na teena le lafo a le Malo o le afioga Faaolesa Katopau Ainuu o le Minisita o Faamasinoga ma lana minisita lagolago le afioga Sooalo Mene, e faapena foi le Minisita o Tupe Maua ma Falepuipui le afioga Tialavea Fea Tionisio Hunt. 

O Minisita lagolago na palota foi e toe faaauau le tofiga Peresetene o Fepuleai Attila o Tuifaasisina Misa Lisati, Salausa Dr John Ah Ching, Lealailepule Rimoni Aiafi, ma Mulipola Leiataua Laki. 

O isi sui faipule na tetee i le lafo a le Malo o Tapusatele Mauteni, Gatoloaifa’ana Amataga Alesana Gidlow, Tafua Maluelue, Faumuina Tiatia Liuga, A’eau Peniamina, Sulamanaia Tauiliili, Fuimaono Te’o, Lea’ana Roni, Aumua Isaia, Toleafoa Poutoa, ma Nafo’itoa Talaimanu Keti o le sui fofoga fetalai ae o le taitaifono lea o le komiti a le palemene sa lauliliuina le mataupu i le Peresetene o Faamasinoga o Fanua ma Suafa. 

O le lafo a le Malo e faamuta le tofi Peresetene na lagolago uma e le toatele o Minisita o le kapeneta ae toatasi le minisita lagolago o le sui faipule lea o le itumalo o Anoamaa i Sasa’e sa ia saunoa e taatia le soalaupuleina o le lipoti a le komiti ae sei toe tagofia ni teuteuga o le faavae faasino i le vaega 68 (5) o loo aiaia ai malosiaga o le Palemene e faamuta ai se tfoiga faamasino o le faamasinoga.

O faipule na lagolago i le lafo o le afioga i le Palemia ma le sui Palemia, susuga Tuilaepa Sailele Malielegaoi, afioga Fiame Naomi Mataafa, Tuitama Talalelei Tuitama, Sala Fata Pinati, Papaliitele Niko Lee Hang, Faimalotoa Kika Stowers, Sili Sala Epa Tuioti, Loau Solamalemalo Keneti Sio, Afamasaga Rico Tupa’i, Laauli Leuatea Poalataivao Schmidt, Amituanai Afoa Fale’ulu Mauli, Toomata Aki Tuipea, Lauofo Fonotoe Nuafesili Pierre Lauofo, Taefu Lemalu Taefu Lemi,  Amituanai  Fagaivalu Kenrick, Seiuli Ueligitone, Faasootauloa Pati, Tofa Foleni, Lenata’i Victor Tamapua, Faalogo Iosefa, ma Faumuina Wayne Fong.

Sa manino le finagalo lagolago o faipule na latou opogi le lafo a le Malo o le tausisia o tulafono o loo faavae ai pulega a le Malo o Samoa e ao ona mulimulitaia, aemaise o le tulaga mamalu o le faamasinoga ma le palemene o le usitaia o iuga a le faamasinoga. Na manino foi le saunoaga a le sui Palemia i le lagolagoina o le lafo na faatu e le Palemia, o lona manumanuga o le Faavae na faataoto e matua ma tuaa e tatau ona usitaia e le Palemene ma tagata uma o le atunuu. 

Na agiga lava i le finagalo o le sui Palemia lona faamamalu i le faavae popo o le atunuu ona sa ia faatepa faipule ise tulaga e toe faaauau ai le tofiga Peresetene o Fepuleai o le a momoli atu ai se feau e taga ise faamasino ona faamaonia sana solitulafono ae tauave pea ona tiute ose Peresetene o le faamasinoga o Fanua ma Suafa. “E taga ise faamasino ona faaauau tusa lava pe faamaonia ua toso teine, faaoolima, gaoi”.

Na taualuga le mataupu i le saunoaga a le Palemia na ia faailoa ai o le faaiuga ua taunuu iai ua le maua le lua vaetolu o le palemene e faatino ai le faamuta poo le faaauau o le tofi Peresetene o Faamasinoga o Fanua ma Suafa o le a toe teuteu ai le Faavae faasino i le aiaiga e faamuta ai le tofi faamasino o le Faamasinoga a le atunuu.