O se finagalo ua ae i le afioga ia Su’a William Sio o le sui faipule o Magele ina ia talo se fonotaga mo tagata Pasefika ua faaigoina o le Immigration Fono, ina ia faamalamalama ai le tele o ni mataupu tau femalagaina o loo nofo le mautonu ai le atunuu aemaise le tele o le fenumiai o faamatalaga o loo feaveai i lenei vaitau talu mai tusifolau ma tupe ia na totogi a tagata ua silia o latou aso i Niu Sila nei mo se nofomau i se tasi o alii Maori.
O Samoa, Toga ma Tuvalu na iai uma o latou sui i lea fonotaga ae toatele ai lava le mamalu o lo tatou atunuu. E tele ni mataupu taua na faailoa mai e pei o le tulaga o loo iai nei alo ma fanau a e o loo nofo solitulafono i totonu o Niu Sila ua le aooga. Peitai i le feagaiga o le aia tatau o ia tamaiti e tatau ona o i le aoga, peitai e tele foi ona aiaiga.
Na saunoa Su’a i le tulaga e tatau ona uia e tagata o loo manaomia lea fesoasoani ma sa manino lava i lana saunoaga e faapea poo a lava au tapenga eseese o loo fai i soo se ituaiga apalai, pemita, toe faaopoopo aso, poo pepa nofomau, e ao lava ia oe lena e manaomia le fesoasoani ona e faamaopoopo i au lisiti, faamaumauga o fetusiaiga, lou tusi folau ma le tele o isi pepa o faamaumauga aua poo ai lava e te tuuaia, o oe lava e pau i ai le faafitauli tonu, e le o le ofisa malaga, poo lou uncle poo lou auntie ae o oe lava. Ua faatulafonoina foi i le taimi nei, ua na o i latou ua umia laisene faipepa malaga e mafai ona e oo i ai i se tulaga faapea.
I le taimi na fefaaaliai ai finagalo o le mamalu o le atunuu na matauina ai le toatele o i latou o loo moomia se fesoasoani. Mai le tele o fesili e lei mafai ona tali uma i le fono na iloa ai o faafitauli sili lava nei:
1. O le gagana ma e manaomia se sui o le ofisa o femalagaiga e malamalama lelei i le gagana Samoa ina ia fai ma fesootaiga mo Samoa lava ia e faapena foi i isi nuu o le Pasefika, ona e le mafai ona talanoa i le telefoni ma le masini a le ofisa o femalagaiga.
2. E fiu e tatali se tali mai a le ofisa o femalagaiga.
3. Leiloa tonu poo ai e o i ai.
4. Taugata tele ae a le talia ua leai se tupe e toe maua mai.
5. Fiu e tatali se tali o apili i le minisita iu ai ina ova aso o le pemita ma le tele lava o fesili sa lei mafai ona faamalamalama atili.
Ua iai nei le fuafuaga o le a taumafai ina ia fai ni fonotaga faapenei i masina taitasi ina ia faamalamalama atili ai mataupu eseese e ao ona silafia. Na momoli le agaga faafetai o le atunuu i le afioga i le faipule ona o lona taulamua i lenei mataupu faigata ma maua ai foi le toomaga o le atunuu.
O le oo mai la o sui o le ofisa o leoleo, le alii satini sinia o loo taiulu i ai suesuega o tusi folau ma tupe ia na totogi ia Otimi ma le sooupu mo le Pasefika o Alf Filipaina, na lagona ai le le malilie o nisi tamalii ona ua faapea mai e sili ona feutagai Samoa ma se leoleo Samoa i le mataupu tau tusi folau ona faigofie lea o le latou galuega. Peitai na faamanino mai lava e le satini e faapea, a aumai lau lisiti ua avatu lau $500.00 ona o loo taofia pea i le ofisa o leoleo lea vaega tupe tele e $41,000.00.
O le taimi nei o loo faaauau pea ona fesiligia e le afioga ia Su’a le malo e uiga i le mataupu tau femalagaiga ma o le a toe logo atu le aso o le isi fonotaga.
