Ufiufi pea John Key i faiga piopio a faipule o le National

Ua faaiu puta, ma ua lē taunuu i se taunuuga manuia, le faaiu ai o le auaunaga a se tasi o tamaitai faipule o le lisi o le vaega faaupufai a le National, Claudette Hauiti. Sa faamavae lea sui faipule i le vaiaso talu ai mai lona tofiga, i lona lava loto fuatiaifo. A o lei faalauiloaina lana faamavaega i ona tofiga i le Palemene, ae sa ia muai toe faafoi le card faapalemene sa ia taulimaina, ina ua mae‘a ona ia faaaogā faalētatau, i ona lava manaoga faaletagata.

O sana malaga i Ausetalia i le tausaga talu ai, sa ia lē tausisia ai aiaiga o le faaaogāina o lea lava card. O le vaiaso i tua atu o le vaiaso talu ai, o le masina lava lenei o Iulai, sa faia ai lana faaiuga e toe faafoi ma aveesea lea card ma ia, ona talu ai sa matuā avega mamafa tele i lona mafaufau le tulaga lē manuia sa ia faia.

O le AsoTofi o le vaiaso na tea nei, ua toe ta‘utino ai lea lava sui, e faapea sa iai foi nisi vaega sa ia faaaogāina i ai lea pepa, poo le card faapalemene. O le totogiina o le penisini o lana lava taavale i le tele o taimi, sa ia faaaogāina i ai. Peitai sa fesiligia foi pe fia se vaega tupe sa ia faaaogāina i ona lava manaoga, peitai, o lana faamatalaga e na te lē o manatuaina.

O nei faiga uma, e matuā solitufono lava i puipuiga ma aiaiga o soo se sui o le malo, o loo umia lea foi faamanuiaga ona o le umia ai o galuega o ni sui aloaia o le Palemene a Niu Sila. O aiaiga ma tulafono o lea lava card, e lē mafai ona faaaogāina e sui faipule, i ni manaoga mo ia lava.
E lē gata i lea, ae ua mae‘a foi ona faatulagaina le maualuga o seleni e tatau ona faaaogāina e sui faipule, se‘i vaganā ai o ni malaga ma ni manaoga e fesootai ma galuega faapalemene ma tofiga o faipule o le maota.

O le tautinoga a Hauiti, o le taimi faatoa ulufale ai i le maota fono i Ueligitone, ma le amataina o lona soifua faapolokiki, sa matuai malosi ai lona faaaogāina o lea avanoa.
O le faifai pea o lea faiga lē talafeagai, sa avea ai o se mea māmā ia te ia le faataunuuina ai pea o ona manaoga, ma soli ai aiaiga ma tuutuuga faatulagaina. O le mae‘a ai o lana faamavaega aloaia, sa faatoa aliae mai ai nisi o mafuaaga moni i tua atu.

E faapea se faamatalaga, na faamalosia le tamaitai faipule, ua tatau ona faamavae ese mai ona tofiga ona o le faletonu lava e pei ona sa ta‘ua. O nisi o faamatalaga e faapea, sa iloa e lea sui o le a toe tuuina i lalo lona igoa mai le lisi o le vaega faaupufai, e mautinoa lona lē toe ausia pe toe nofoia lona nofoa i totonu o le maota.

O Hauiti, ua mae‘a ona filifilia e le National e tamoe ma tauva, mo le itumalo faapalota i Kelston. Peitai e ui ina ua mae‘a ona aloaia ma faalauiloaina lea tulaga, ae ua lē mafai ai ona toe taofia o ia mai le faamamulu ese mai e tusa ma lana lava faaiuga, faatasi ai ma se filifiliga mulimuli ane a le vaega faaupufai.

Sa tulituliloa e le aufaasalalau, ma le autusitala, le taitai o le vaega faaupufai a le National, o le Palemia foi lea John Key, ma fesiligia pe fia se vaega tupe na oo i ai le faaaogā a lē sa avea ma faipule.
Ona talu ai o ia o le taitai, sa tatau ai ona ia faalauiloa lea tulaga mo le penefiti, atoa ai ma le silafia e tagata lautele, o loo tigaina e faatupeina auaunaga faapalemene.

Ae o le tali mai a le alii Palemia, e na te lē iloaina, o lona uiga afai e lē iloa e lē sa avea ma faipule tupe sa ia faaaogāina sese, o lona taitai sa tatau ona tautala i le mea moni. Peitai e foliga mai o loo iai pea lava se vaega o loo ufiufi e le Palemia ma le fono faatonu a le vaega faaupufai.
Ua lē na o le pau lea o faipule o lea lava vaega faaupufai, ua latou soli le tulafono, ma faia faiga piopio faapea, i le faaaogāina faalētatau o tupe a tagata totogi lafoga. Ae o le isi tulaga ua maitauina, o le faamavae ese mai o se faipule i ona tofiga i le mae‘a ai ona faia o solitulafono, ua gata ai lava ma lea foi mataupu, ma o lona taunuuga foi lea.

Peitai e ao pea ona fesiligia le amiotonu, ona o soo se tagata ua solitulafono faapea, e tatau ma o le mea moni, e tatau lava ona faia se suesuega faaletulafono. Pe Faipule, pe Minisita, e oo lava i le Palemia, e tasi lava le tulafono mo tagata uma ma e tutusa foi tagata uma i le tulafono.

O ai e fai i ai suesuega faapitoa, ao ai e lē faataunuuina i ai lea faiga, i le solitulafono lava e tasi? E ao foi ona manatua, o soo se vaega tupe e aafia ai tagata lautele, ua iai foi ma le aiā tatau, e toe fesiligia ai lona faaaogāina.
E aliali mai, ua matuā pule tutoatasi lava le Palemia ma lana faigamalo i faaiuga e faia i soo se solitulafono e aafia ai sui o le malo, ae a faapefea le amiotonu, ma tagata lautele o loo fausia ai le malo ma le atunuu?

E tasi le auala e ao ina manatua e soo se faigamalo, a leai ni aiga, e leai foi se malo, a leai ni tagata lautele o se atunuu, e faavae i le ea le faigamalo.
E manaia foi le faiga o le pepelo a John Key latou ia; e pepelo pupula sa‘o mai lava i luga o le televise, i le faitau afe o tagatānuu o Niu Sila. E fiu le tagata e lafi i le mealilo, e iai le aso e faailoa ai, e lē tumau pea lava foi le pogisa, e iai lava le taimi e ao ai, ma malamalama ai mea uma, ona iloa ai lea o le amioleaga ma le pepelo.
Le tamaitai faipule o le lisi a le National ua faamavae nei, Claudette Hauiti Photo:vote.co.nz