• Leai se Api o le Galuega a le ekalesia
• Faatulai ese le Failautusi o le ekalesia, ua lē faatuatuaina
• Vaeluaina le ekalesia, 26 aiga mo le faifeau, 22 aiga mo le ekalesia
• Musu le faifeau e faafoi mea totino a le ekalesia
O le tatalaina o le feagaiga a le susuga i le faafeagaiga ia Lale ma le faletua ia Vini, ma le ekalesia EFKS o le Sāvali o le Filemu i Magele, ua lē o tulai mai i se tulaga toafimālie e pei ona iai nisi o lipoti ua toe oo mai.
O se tasi o sui o le aulotu o loo tumau pea i le ekalesia na faaoo maia lenei lipoti, e ui e lē o finagalo e faaalia lona suafa. Peitai o lana molimau maumaututū, ua fai lava sina faafeufeu o le latou mataupu.
Aemaise lava o le tulaga ua iai nei, ua lē na o le faafeagaiga ma le faletua ua tatala le latou feagaiga, ae foliga ua vaeluaina ai foi ma matafale ma aiga lolotu o le ekalesia, e 26 aiga o loo lagolago ma o ese faatasi ma le faafeagaiga, ae 22 aiga o loo tumau pea i le ekalesia. Na ta‘ua e lenei molimau, o le faaiuga o le vaiaso na faia ai le fonotaga a le Komiti Faafoe a le ekalesia o loo iai nei, ma pasia ai nisi o iugafono e pei ona faatulai ese ai ma le faletua sa iai i le tofiga failautusi o le ekalesia, ina ua ia tautino lava e ia, o lana lagolago o loo i le faafeagaiga ma lona faletua.
O le itu sili ona ogaoga o le molimau na tuuina mai, aemaise lava o se tasi lenei o mea e sili ona tāua i soo se ekalesia auā le faamaumauina ma le faamaopoopoga o meafai uma tau le ekalesia aemaise ana meatotino ma seleni faaalu, o le Api o le Galuega. Faapea se molimau, sa agai atu le susuga i le faifeau ua iai nei i le aulotu i le susuga ia Lale mo le toe faafoi ane o le Api o le Galuega, peitai na ta‘ua e le faafeagaiga, e leai se Api ae na o faila na tuuina ane.
O le tasi lena o mataupu ua gugulu ai nei nisi o le aulotu, ina ua foliga mai ua goto i le vasaloloa le atoaga o faamaumauga tāua uma a le ekalesia.
E pei lava ona silafia, soo se mataupu lava e tatau ona lua pe sili atu foi ni itu o se mataupu.
O faamatalaga ua tuuina atu i luga, o faamatalaga lava mai le sui o le aulotu o loo iai nei, peitai sa taumafai le tusitala e fesootai atu pea i le susuga i le faafeagaiga ma le faletua o loo agai tonu i ai lenei mataupu, mo so laua foi finagalo e tusa o manatu ua lāgā mai e le itu a le ekalesia. Peitai e lei maua se fesootaiga i le susuga ia Lale, ae ua faatulaga nei se avanoa i se taimi o lenei vaiaso e toe fesootai atu ai ia laua.
O le faaiuga foi a toeaiina o le ekalesia na poloaina ai le tatala loa o le feagaiga a le susuga i le faafeagaiga ia Lale Peteru ma le faletua ia Vini ma le ekalesia sa galulue ai, ua amata ai nei ona nenefu ma lē malamalama ai le toatele o tagata lotu, aemaise lava foi i le aufaigaluega galulue.
E lē o toe po se lilo, ma e lē tau toe tolaulauina faaiuga ma iugafono ua mae‘a ona faataoto e toeaiina, ma o se alafua foi lea e tatai uma i ai faaiuga mo ni faafitauli e ono lamatia ai le galuega. Peitai o le mataupu i le va o Lale ma Vini ma le Ekalesia Sāvali o le Filemu, e foliga mai ua see ese le faaiuga ua faia ma le faafitauli na alia‘e mai. Sa manino foi i le lauga a le faifeau i le aso o le tatalaina o le feagaiga, lona vaevaeina ma lona talitonuga i le mea tonu o loo taoto ai faaiuga fai a le ekalesia. E lē tatalaina se feagaiga ma se aulotu i le ta o le tatau poo le malu, se‘i vaganā ai le mulilua, ma le fasioti tagata.
O lona faatulagaina lea o solitulafono e ono aiāina ai ma mavaevae le feagaiga. E lei fia saunoa tele le faletua ia Vini ina ua talanoa atu i ai, e uiga i le mataupu talu ai o lona amanaia ma le faaaloalo pea e talia le faaiuga a toeaiina ua faamatuu atu mo i laua. O loo iai pea le naunau o le faletua e tausisia ma usitaia pea le faaiuga ua tatala ai le feagaiga, peitai e lē o le mutaaga lea o le soifua galue e pei ona ia saunoa i ai.
Ae ua faaosofia lagona e toe sailiili matagi pea agai i toeaiina mo le tofa tatala e uiga i le sa‘o ma le mea moni e tatau ona iai mataupu faapea. Ona talu ai e toatele foi nisi sa faaalia o latou finagalo e uiga lava i le tulai mai o le mataupu i le faifeau ma lona faletua, ma le faaiuga ua fai nei i ai.
Na saunoa le toeaina o le pulega ina ua fesiligia, poo le ā le umi ma le faasalaga o le faaiuga ua faataunuu mo Lale ma Vini. Na tali mai e faapea, o le a faatali i le fono a toeaiina i Samoa e aumaia ai le tali o le fesili. Ae o le a faataunuu lava le tatalaina o le feagaiga a le faifeau ma le aulotu, ma ua mae‘a foi ona faaoo i ai le poloaiga ina ia tatala vave le feagaiga ma tuua loa le ekalesia.
Sa taumafai pea le tatou nusipepa ina ia toe fesiligia pea toeaiina e uiga lava i le fia faamalamalamaina o ana faaiuga tumau ma faiga faavae, talu ai ua amata ona lagalagā finagalo o tagata lotu, ona o le eseese o le faatinoina o tiute ma faaiuga fai.
E lei manuia taumafaiga a le Samoa Times ina ia toe fesootai atu i toeaiina i le faaiuga o le vaiaso. Ae ui i lea o le taumafai pea ina ia tulituliloa so latou finagalo tonu e uiga i le mataupu. O le popolega ona o le fememeai o nisi o tagata lotu, poo fea le moni ma le sa‘o o taoto ai solitulafono ma ona faaiuga.
E lei maua foi se feiloaiga ma le susuga i le faifeau ia Lale e tusa ai ma sona finagalo, se‘i vaganā le faletua ia Vini sa talanoa atu i ai. Ae o se faaaliga manino foi a le faletua, o le a taoto ai faapea le mataupu, e faitalia lava toeaiina ma le latou faaiuga pe sa‘o pe sese, ae faamasino le Atua.
O le Aso Sa na tea nei o le Aso Sa muamua lea na lē toe nofoia ai le nofoa o le faafeagaiga i totonu o le tapuaiga a le ekalesia sa galulue ai, ona o le faataunuuina o le finagalo o toeaiina ma le ekalesia aoao.
Ae na faamaonia mai e se tasi o le ekalesia e faapea, ua mautinoa e tusa ma le 26 matafale o loo tumau pea lo latou lagolagoina o Lale ma Vini.
O aiga lotu foi ia ua faasee ese nei mai le ekalesia muamua sa iai, ae ua faaauau pea ona mafuta ma le faifeau. E lei fia saunoa foi le faletua ia Vini i le tulaga o le a oo i ai le soifua auauna, aemaise ai o loo toatele pea le ekalesia pe a fua i le aofai o matafale o loo lagolago atu, e ala i le tuua o le ekalesia sa iai faatasi.
