E ui ina saoasaoa ma maualuga le lele a le Manu i le la taaloga faitaulia ma le Kagalū a Ausetalia, i le sailia o le siamupini i le taamilosaga taitoafitu sa faia i Iapani i le faaiuga o le vaiaso, peitai o lana apatā mulimuli lava na toe mau lelei ai le ū a le Kagalū ma toe toso mai ai i lalo.
O se tasi lea o taaloga sa matuā mataina tele, i le faagasologa o taaloga uma i le taamilosaga atoa.
O le taufai finau ma le malolosi o ‘au e lua, o le isi itu lea sa maitauina ma sa matagofie tele ai lea taaloga.
Sa tele avanoa e lei faaaogāina tatau e le Manu Samoa, ae o le osoosoga o le malosi o tama taaalo fou a Ausetalia, sa lē sepu ai se mea e tasi i le latou vaai ma penefiti ai i mea na sese ma faaletonu a le Manu.
E leai tele se eseesega i metotia sa faaaogāina e ‘au e lua i le taaloga, se‘i vaganā ai agavaa ma tomai sa mautinoa lava le tulaga ese ai o Samoa.
Ae o le taunuuga o le taaloga, sa lē mafai ai e agavaa o le Manu ona puipui ma taofiofi Ausetalia i lana osofaiga mulimuli a o sili pea ona ‘ai. O le osofaiga lea na iu ina talepe ai ma toe kolosi ai le laina sikoa e Ausetalia, ma sa manumalo ai loa i ‘ai e lua.
Na toe faatepa e le Manu le lalolagi i le maualuga o lona tulaga i le faatinoina o le lakpi taitoafitu, ina ua ia faatoilaloina Aferika i le pau ma nofo (quarter finals), toe faatutupa ma Niu Sila i taaloga a au e fa pito i luga poo Semi Finals.
Ae o le au a Ausetalia, sa mataina ma maualuga foi le faatinoina e se tasi o alo o le atunuu le susuga ia Allan Faalavaau o le taaloga.
O le tāua o lona sao i le faatoatoaina ma le sailia o avanoa mo osofaiga a lana au, ma sa avea o ni malosiaga ia mo Ausetalia, ma oo ina vaivai ma lē malu ai le puipui a le Manu.
O le faato‘ā toe foi ai lea o Ausetalia i se tulaga maualuga o lana au taitoafitu talu mai ni tausaga se tele i taamilosaga a le IRB.
Na tulaga ese lea agai mai o Ausetalia i le taamilosaga lenei i Iapani, pe a fua i nisi o taamilosaga muamua ma taimi ua mavae.
Na faamaonia le malosi tele o Ausetalia, i le la feiloaiga ma le au malosi a Egelani i le Semi Final.
E tele i tama fou, ma le laiti tama taalo a Ausetalia, ma o loo valoia le faatumauina o le malosi ma le lelei tapenaina mo nisi o vae o lumanai.
E manaomia e Samoa nisi tuufaatasiga se tele, ina ia faatumauina lona malosi atoatoa, e faaleoleo i taimi leaga ma taimi e manunu‘a ai nisi o tama o loo faamoemoe i ai.
E pei o le tulaga na maitauina ina ua malolo le alii o Paul Perez, na telē se faaletonu i fesootaiga ma gaioiga a tama taalo.
O le isi lea faafitauli na vaaia i le taaloga mulimuli ma Ausetalia i le sailia o le siamupini.
O le taaloga a Samoa ma Niu Sila, o le isi lea taaloga mataina tele ma le faamalieloto, ona o le finau ma le sailimalo o tama taalo.
E ui sa sasi foi lana puipui na toe maua ai le avanoa o Niu Sila ma tutusa ai ‘ai, sa mafua ai ona faaopoopo le taimi. Peitai na vave ona toe faasa‘o le sese ma le sasi, ina ua toe foi atu i totonu e faatino le taimi faaopoopo, na sikoa ai e le alii o Alatasi Tupou i se sikoa faapopole loto.
O le taimi nei o loo tulaga muamua pea Niu Sila e 128 ona ‘ai, tulaga lua Fiti e 122. O Aferika o loo tulaga tolu e 105, sosoo atu ai Egelani e 104, ae tulaga lima atu ai Samoa e 101 ona ‘ai.
O le alii o Paul Perez o Samoa o loo tulaga tolu i le faasologa mai luga o tama taalo aupito maualuga sikoa na latou maua i le taimi nei, i le faatulagaina a le IRB.
