Ua oso i fafo Seepa ma tilotilo atu i isi atufalega i le latou pitonuu, o loo faapena foi ona laga ane i fafo tagata ma autilo i le sami, lea ua iloa atu ai se vaaiga uigaese, ua faafuasei ona ali mai amu, ae ua matua leai atu se suasami. Ua lagona le taumanuo o tagata, ‘auoi o le galulolo, auoi o le galulolo, tamomoe, tamomoe i uta.’
E tasi lava le mea na tau i ai le mafaufau o Seepa, o le toeaina ma le loomatua, ona momoe mai loa lea i luma i lo la fale ma faanatinati atu i ai, ua tatau ona latou o ese i uta, o le galulolo ua sau.
Na tau oso foi le fia poto o le loomatua, ae na ee atu i ai le toeaina e tu vave i luga e o ese mai le fale.
Ua vevesi solo le nuu, ua tamomoe mai isi taulelea o le puiaiga lava, ua fesoasoani e sii le toeaina ona e fai sina faaletonu o ona aao, ae o loo mau Seepa i le lima o le loomatua, a o le isi lima e afisi si ana tama ma tamomoe loa.
O le matau atu a Seepa, e ono afaina i latou ona e le o faigofie mai le loomatua, o lea na ia tuu atu ai lana tama i le isi teine ma faamolemole atu e tamomoe ma si ana tama, ae ua tago limalua mai nei le fafine ma taumafai e opoopo atu le tina o lona toalua ma unai malosi i luga o le matie ma augani atu, ‘Gagau, o le galulolo lea ua oo mai, tatou tamomoe faamolemole.’
O le galu lona lua lava lea na toe malosi mai, atonu na lia‘iina i luga se tasi o tamaligi tele, ma pau atu ma maua mai ai lava si fafine a o taumafai e unai vave i luga le loomatua. Na pau ifo Seepa ma toe sesee mai i lalo, ma avatu loa e le galu i le moana, ma lilo atu ai lona tino.
