E le taitai la ona taulia ia Gagau lena itu, na pau moomooga o Gagau sa iai, ia sosoo faatasi gafa o lo latou aiga ma le aiga afakasi faipisinisi o le afioaga o Fagasolofa, a o lenei ua motusi uma e Tavita moemitiga a si ona tina.
O le itu lea e faanoanoa ai Tavita, aua sa faigaluega foi si ona toalua i Apia i se kamupani tele gaosioloa, ae na faamavae lava mai lana galuega lelei sa iai, ona o le manao e nofo e tausi le la tama ma ia tausi lelei ona matua aua ua leai se tamateine o totoe i Samoa, ua o uma i Niu Sila.
E leai foi se tagata o le nuu e le talanoa i le lelei o le fafine o Seepa i le tausiga o matua o lona toalua, le ala lea e inoino ai isi i le loomatua i ona uiga tufanua nei, o vaai atu lava i le alofa o le tama i lona toalua, aemaise si nei fafine ua alu uma le ola i le tausiga o laua.
Ua toe lua vaiaso alu le tafaoga a le toeaina ma le loomatua i Niu Sila, ma ua leiloga se mea e tago i ai Seepa i le tapenaina o mea o le malaga, e fai o le oso e ave, o meaalofa Samoa mo tuafafine o lona toalua i Niu Sila, ae o teuga a le toeaina ma le loomatua e malaga ai.
O le po la lea o le Aso Gafua, na fai le tonu a le ulugalii, a usu Tavita i Apia e faigaluega, ona tietie mai ai lea ma Seepa i le isi nuu lea e iai le aiga e faatonu i ai ni kekesaina ma masipopo e fia ave i Niu Sila.
Peitai e malama ae le taeao ua toe sui le tonu a Seepa, e sili ona afe Tavita i le aiga pe a manava mai, ae toe nofo o ia leaga na alu le po o faataletale le loomatua i tei ua tuai mai e fai se la meaai.
Ua sogi faamavae atu le tama i lona toalua ma si a la tama, ona alu ese atu loa lea i lana pikiapu, pe tusa o le tea lalititi o le itula e ono i le taeao, ae ua liliu ane le fafine amata ona tapena se malu taeao a le toeaina ma le loomatua. Na faapea le fafine ai o sana miti, ae paga lea, na matua galulu le fale o le aiga i le lulu a le mafuie.
