Pau le itu o loo tau ama mai ai le mafaufau o si fafine, o lea e ta‘u le malaga a le toeaina ma le loomatua e o i Niu Sila e tafafao i le la fanau teine matutua la ua leva ona nonofo ai, ma e foliga mai fuafuaga o le malaga, e atoa le tausaga i Niu Sila.
Ua na o le talotalo o Seepa, tuai ia ona oo mai lena aso, le aso o lona saolotoga mai lagona mafatia. Ua manatua e Seepa le tali a le isi tamaloa Palagi na latou faigaluega faatasi, ina ua fesili i ai se tasi pe aisea ua le faia ai sona toalua Samoa aua ua leva ona nofo i Samoa.
Fai mai le tali a le Palagi, ‘a e faaipoipo i se teine poo se tama Samoa, tusa o lena ua e faaipoipo i le aiga atoa.’ “Pei lava e sa‘o le Palagi, e tusa lava pe alofa lota toalua ia ta ita, ae leai se fiafia moni, pe a inoino mai matua ma le aiga o le toalua”.
O Seepa e lei matilatila le maualuluga o ni ana aoaoga, ae o se tamaitai e atamai lava i soo se mea, aemaise le faiga o le fatuaiga, ma o se avā sa lelei ona aotauina e ona matua i le auala e faatino ai lana nofogatane.
Poo le ā le fia faaali i fea o sona manatu i nisi o meafai a le aiga, e le taitai lagona se leo i luma o matua o Tavita, seiloga lava ua o i lo la fale i tuafale, ona faatoa fai lea o sana tuualalo i lona toalua. O uiga nei o Seepa e pele ai ia Tavita, ma ua matua talitonu le tama, o le fafine lava lenei na foai mai e le Atua mo ia.
