Mai lava ina ua faatoa nonofo si tama o Tavita ma lona toalua le fafine o Seepa, e le atoa lava le fiafia o lona tina i si ona toalua. Tiga foi ona faufautua i ai le toeaina e faamamā ia lona loto ma vaai i mata o le tamaititi, ae le mafai le loomatua le nofo ma faatusatusa Seepa i le afafine o le afakasi faipisinisi lea sa moomoo Gagau talosia ia oo ona nonofo ma lana tama, aua ua leva ona aave tala o lena faigauo i totonu o le afioaga o Falesolofa.
Ua paso le mafaufau o si tama o Tavita e tau faavasega uiga vaivai o lona tina i si ona toalua. E iloa lelei foi e si fafine le ita o le loomatua ia te ia, ae pei lava o le mea noa ia Seepa ona o le alofa i lona toalua ma si ana tama, aemaise foi le toeaina.
“Ae a pe a tatou o ia i utā i le maumaga tatou nonofo ai,” o le faamelotagi lea a si fafine i se tasi afiafi a o fai le la kuka ma lona toalua. E leai se tali a Tavita na o le punou lava ma faitau lana nusipepa.
“E le faapea ua ou musu e tausi ou matua, le ala lena ou te le fai atu ai tau te o i lo‘u aiga ae pau lou mafaufau, e sili le nonofo ese o taua ia, ma tausi mai laua. Aua ua sola o ta mafaufauga poo a nisi faiga lelei ma ni upu suamalie e malie ai le loto o lou tina ia te au, lenei ua savali le fa tausaga o ta nonofo.”
Ua tau ita le fafine i le fiu e fai atu ae aunoa ma se tala a lona toalua e pei e na te le o lagona pe le o fia lagona foi ana tala o loo fai, ae o le mea moni o loo matua ootia le tama o Tavita i le alofa i si ona toalua, aua e sa‘o uma lava ana upu o loo fai atu. “Ana ou manino o uiga nei o lou tina ia te au, e le taitai ona ou ioe ta te nonofo.”
E lei uma lelei upu mulimuli ia a Seepa, ae liliu mai loa Tavita, “ia ua lava loa lena o le a amata ona lē malie lau fati. E le se mataupu lena e talanoaina i lenei taimi.”
Na gata ai foi i lena afiafi le laga ae e Seepa o le mataupu i le tina o lana tane, ae ua taumafai lava e onosaia pea uiga o le loomatua.
