Na iai taimi na maligi loifofoga a’o āsaina mai le gasū o le tai taeao, ae sa lei augatā le lagona finafinau ina ia tulituli matāgau pea le ufi a le tamaitai. Lenei la ua tau lau o le faamoemoe, ma e ui o le tagata sa galue ma tauivi ina ia tino le moemitiga, ae na saunoa lava le alii loia, le Afioga Atoa Peter Petaia, ‘o le viiga lava ia ma le faafetai e toe faafoi uma i le Atua, auā o ia lava le Mataisau ma le Puna o atamai uma.’
O le afiafi o le Aso Fraile, 3 Aokuso 2018, na tatala aloaia ai le ofisa loia a le Petaia Lawyers & Associates i se faatasiga na valaaulia ai aiga, uo ma aumea mamae ma nisi o le mamalu o le atunuu e molimauina lenei matati’a tāua ua mafai foi ona laasia e lenei tamalii ae o se alo o Samoa ua nopia’i nei ma lona aiga i Niu Sila.
Na saunoa Petaia, o lona ofisa loia sa amata mai lava i Samoa i le tausaga 2002 i lalo o le igoa Petaia Law Chambers.
Peitai na suia fuafuaga ma autovaa mai ai Atoa i Niu Sila i le tausaga 2004, ona o nisi foi o mafuaaga i le galuega ma fia faaauau le aoga a lona faletua, Leota Dr Lisi Petaia, ma faaaooga ai le la fanau i Niu Sila. Ae pei lava o le toatele o tamafanau a Samoa, e mausali pea le faamoemoega i se taimi oi luma, e toe faatini lava se tautua i le atunuu na amatamea mai ai.
Ona faasolo ai lea ona galue Atoa i nisi o ofisa loia i Niu Sila nei, na amata mai Kalaiesetete seia oo ina ua siitia mai i Aukilani. i le taimi e tasi a’o galue Atoa i nei ofisa loia ma ia matauina le auala sa faatino ai nei ituaiga o auaunaga i tagata na sulufai atu mo ni fesoasoani i mataupu tau le tulafono, na totogo a’e ai lava i lona loto se moemoe naunauta’i ma se moemitiga, e tatau lava ona oo mai se aso, ia tulai mai se ofisa loia e faauluulu lava i alo o Samoa, e faatino sa’o atu ai foi le auaunaga i nai o tatou tagata Samoa.
Saunoa Atoa, afai ua fau ma soloi ofisa loia e faauluulu lava i tagata Initia latou ma Saina auā le tautuaina o latou foi tagatānuu ua aumau i Niu Sila, aisea la e lē mafai ai foi e alo o Samoa latou ua umia faailoga maualuluga i nei tomai faaloia, ona faatulaga ni o latou ofisa loia e tali ai le sulufai mai o latou tagata Samoa e ui e lē faapea e punitia ai le auaunaga i soo se lanu ma soo se gagana.
Mulimuli ane na ia galue ai loa i se isi ofisa loia i le faaitu i Saute o Aukilani ma amata ai i le 2011 le Pacific Law International i Manurewa, ae sa iai i lalo o le faamalu a le ofisa loia a le Mike Lucas Law Firm. Na faaleo e Atoa lona agaga faafetai i le fesoasoani a lea foi ofisa loia a’o latou galulue faatasi, peitai e lei mafai ai ona taotaomia ai lona faanaunauga ia tino lava lana moemitiga ia faatu sona lava ofisa loia tutoatasi, e lē toe tau piitaga atu fua pe faamalumalu mai ai se isi ofisa loia a nisi tagatanuu.
O le moemitiga lena o lea ua tino mai nei, ua suia ai loa ma le igoa i le Petaia Lawyers & Associates. Ma o le Afioga Atoa Peter Petaia, o ia le alii pule o le ofisa loia (Principal) ae o loo galulue faatasi ma se isi foi alo o Samoa, le tamaitai loia o Elizabeth Chan Tung-Peters (Practice Manager/Lawyer), i lo la ofisa autu i Manurewa. E iai le faamoemoe e mulimuli ane o loo silasila le alii pule ina ia toe maua nisi loia latou te galulue faatasi a’o faasolosolo pea ona faalautele atu le auaunaga, aemaise o loo iai le fuafuaga i le tausaga fou 2019, o le a toe taliu atu le tamaitai loia o Elizabeth ma lona aiga i Samoa, ma galue mai ai o ia i le latou ofisa i Samoa.
E iai foi nisi tamalii ma alo loia o Samoa o loo latou galulue soosootau’au, i le tulaga o le tuu atu i ai o mataupu a ni clients a le ofisa e latou te faatinoina i matata foi o loo patino iai tomai faaloia o na alii ma tamaitai loia Samoa pe a talafeagai, e pei o le fuafua pe manaomia se legal aid (totogi e le malo), ae pe agavaa foi mo lena polokalame.
E lē faia e laua ni mataupu i totonu o fale faamasino e pei o mataupu tau soligatulafono, ae galulue atu i laua i le ofisa i isi vaega eseese uma e manaomia ai fautuaga faaloia mo le tulafono.
O mea lava e latou te faatinoina e talafeagai ma o tatou tagata Samoa e aofia ai, le Faatuina o ni Pisinisi, Kamupani, soo se Faalapotopotoga Faaletulafono, Aulotu, Mataupu tau i Galuega, Faatau Atu pe Faatau Mai sou Fale, Faatau Atu pe Faatau Mai sau Pisinisi, Faatuina o Tino Faaletulafono Tausi Aseta Faamavaega (Family Trust), Uili poo Mavaega, Tufatufaina o Esetete a ē ua maliliu, Lisiina Atu poo le Lisiina Mai o Fale, Nonoga Tupe poo Mokesi i soo se ituaiga e aofia ai le Toe Faatupeina o Mokesi (Refinancing), Liliuina o Tamaiti mai Samoa, Pepa Malaga, Visa o soo se ituaiga, Pepa Nofo Mau, Pepa Sitiseni, Maliega faaulugalii e pulea ai Meatotino (Relationship Property Agreement), Inisiua ma soo se mataupu tau Samoa, auā o loo iai foi Ofisa Loia o loo latou galulue faatasi, aemaise o lea ua fuafua o le a faatuina le lālā o le latou ofisa i Apia i le faaiuga o le tausaga.
O le Afioga Atoa o loo ia umia tusipasi o le BA, LL.B, mai le Iunivesite o Waikato, PLS, ma le LL.M (Hons) mai le Iunivesite a Aukilani. E tele foi isi ona agavaa faapisinisi i Samoa ma Niu Sila. A’o lei see mai le aiga i Niu Sila, sa galue faaloia foi Atoa i Fiti mo le malo Fiti, galue faaloia i Samoa mo le malo Samoa, ma e pei ona ta’ua i luga, sa galue mo ni tausaga i nisi o Ofisa Loia tetele a papalagi i Karaiesetete ma Aukilani.
Sa seei foi Atoa i nisi o Boards poo Komiti Faatonu a le malo i Samoa, ma pisinisi tuma’oti, e pei foi o le pisinisi a lona aiga o le PILLAR9 Ltd i Saleufi i Apia. E faaipoipo atu i le tamaitai fomai o Leota Dr Lisi Petaia (nee Aiafi) o Alafua, Vaitele ma Gautavai ma Asaga i Savaii.
O Dr Petaia sa galue i le falemai tele i Motootua a’o lei siitia mai i Niu Sila, ma galue ai i falemai i Kalaiesetete, Middlemore, Waitakere ma isi. E toalua o la alo tama o loo i le kolisi i le taimi nei, ma le faamoemoe e ofi atu i le Iunivesite a Aukilani.
Ae mo le tamaitai loia ia Elizabeth Chan Tung-Peters, o loo ia umia faailoga o le BA Legal Studies mai le Iunivesite o La Trobe (Ausetalia), LL.B mai le Iunivesite a le Pasefika (Fiti), Faailoga Loia Faapolofesa mai le College of Law, Niu Sila, ma le Faailoga i tomai tau Faatau Fale (NZ Open Polytech).
E tele lona agavaa ma tomai faapisinisi aemaise mai le pisinisi a lona aiga i Pesega, le Tavita Chan Tung & Sons Ltd. E tele foi a la pisinisi faakamupani ma lona alii ia Ross Peters sa faia i Samoa a’o lei malaga mai i Niu Sila i le 2013 e faaaooga o la alo tamaitai e toafā, lea ua ulufale uma i le Iunivesite a Aukilani, ma ua mafai ai foi ona toe taliu mātua e toe faaauau galuega ma pisinisi i Samoa ae faaaigalua mai ma Niu Sila.
Ua moni le upu, e itiiti a’a o le laau i lo a’a o le tagata, auā o le Afioga i le alii loia e mai afioaga o Vaivasetai ma Vaivaseuta, ae suafa i le Atoa i Tanugamanono i le Vaimauga (aiga tina). E suafa foi ia Aiatia mai Solosolo i le Anoamaa (aiga tamā).
E suafa ia Ausiaamanaia mai Asaga i Savai i le aiga Sa Matafeo (o le faaaloalo maualuga a le paolo o le toalua ma le fanau). E piitaga atu foi i Ulutogia, Aleipata, Fusi ma Saanapu, i Safata, Potutasi i Falealili, Malie ma Levi, Saleimoa i le Tuamasaga, Fasitoo & Faleasiu i Aana, Manono i le Aiga i le Tai, faapea Iva, Lalomalava, Sapapalii, Fusi ma Siufaga i Safotulafai.
O le tamaitai loia o Elizabeth na soifua ane i Alafua ma Pesega, ma e lei suafa Elizabeth ona o loo ave pea lana faamuamua i lona toalua le Alii Inisinia Savili (Civil Engineer) o Tuautu Semau Matafai Ross Peters, o loo tauaveina foi suafa o si ona aiga ae tapuai. O ona aiga tausi o le Vaimauga (Letogo, Tanugamanono, Fagalii, Vailele, Laulii), Aleipata (Lotofaga, Saleaaumua, Ulutogia), Aiga i le Tai (Manono), Aana (Fasitoo), Safata (Sataoa), Safotulafai (Salelologa ma Iva). O ona aiga tamā foi e aofia ai ona aiga i Hong Kong ma Saina.
O le Petaia Lawyers & Associates o loo i le Level 1, Munro’s Building, 162 Great South Road, Manurewa i Aukilani.
O taimi e tatala ai le ofisa e mai le 9am i le 5pm, mai le Aso Gafua e oo i le Aso Faraile. E tatau lava ona muai faafesootai le ofisa e faatulaga le taimi e oo atu ai mo se mataupu e feiloai ai i le alii ma le tamaitai loia. E lē tatalaina le ofisa i Aso Toonai ma Aso Sa.
E maua le ofisa i le telefoni (09) 2676995, Imeli: peter@petaialawyers.co.nz poo le elizabeth@petaialawyers.co.nz O le mau tauave poo le motto a le Petaia Lawyers & Associates, e pei ona tusia i le gagana Latina i le latou Logo (Habe fiduciam in Domino) ua latou sii ai upu a le Faataoto 3:5 lea e faapea mai, “Ia e faatuatua ia Ieova ma lou loto atoa; a e aua le faalagolago i lou lava atamai”, o se tasi o fuaitau o le Tusi Paia sa a’oa’oina ai lava Atoa e si ona tina o Iokapeta Petaia, na faatoa maliu ia Tesema 2017, i le 93 o tausaga o lona soifua.
