O le aso ma le taeao nei, ua moni le tala a le tusi, ua faia e Ieova mea tetele ua tatou olioli ma fiafia iai, o le faamoemoe ua taunuu o le laau o le ola lea. Aua e ui lava i se finagalo sa fa’atofa la’i, a’o se pa sa faufau i finagalo ma o tatou faamoemoe i le fa’asoasoaga a le Atua, a’o le taeao nei, Aso toonai 27 Mati 2010, ua vaelupe maua ae le vaelupe sa’a, ua aulia manuia le atoaga o le 70 tausaga o le soifua o le afioga Leulua’ialii Leilei o le afioaga o Sala’ilua.
O le paia lava lea i alo o Sina ma alii o Paepae, afio mai le Aiga sa Amituanai, susu mai oulua suafa o Mulipola ma sa Laulu. Maliu mai oulua matua o Tuato ma Tolova’a, lau fetalaiga Faatoafe ma le mamalu ia Salemuliaga.
O le faailogaina o le aulia mai o nei tausaga taua i le soifua o le tama matua ia Leuluaialii, o ia o le taitai ma le failauga faamaoni foi o le talalelei i le ekalesia Metotisi mo le 39 tausaga, na faamanatuina lea i se sauniga faapitoa i totonu o lana matagaluega Metotisi i Kalaiesetete, taitaia le lotu e le tausi matagaluega Rev Ale Palelei.
Na to’atele le mamalu o le valaaulia na auai, aemaise susuga i tausi matagaluega ma o la faletua Rev Ropeti Enoka ma Rev Poasa Leau, faapea susuga i faifeau malolo ae tainane paolo ma gafa e molimauina lea aso taua.
Na soifua mai Leulua’ialii i lona afioaga o Sala’ilua i Salafai ma malaga mai i Niusila i le tausaga 1970 e saili manuia e ala i galuega. Na faamautu o ia i Kalaiesetete ae peitai na toe malaga i Samoa ina ia taumafai e aumai le tina o le aiga ma si ona afafine e nonofo mau i Aotearoa aua se lumanai manuia o fanau.
Na taua e Leulua’ialii le faigata o le tuua o Samoa ona o le tautua matavela a le tina o Levaoalii i totonu o lona aiga, ae ui i lea sa tu’uvaa mai faatasi ma faamanuiaga a si ona tuaa, ina ia manatua le lotu ma le aiga, aemaise fanau ia maua ni lumanai lelei.
E to’afa alo o le toeaina ma fanau faaletulafono e to’afa foi, ma i se saunoaga a le tama, sa ia le manatu e faailoga lona aso fanau talu ai o le alofa i le taugata o le soifuaga, ae o le loto o le fanau ma le loomatua lea la ua lolo ai sona taofi.
O se tama alofa, filemu ma le le faalogologo tiga, pei ona molimauina i lana auaunaga i totonu o lana matagaluega, e le mana’o e ola falolo lana fanau pei ona taua e se tasi o ona alo.
Na faaalia foi e le molimau a le fanau si o latou tama i lana galuega usupo i le malulu, galue palapala ona o le taumafai e totogi a latou aoga, lea ua i’u manuia uma i latou, o le latou faafetai lea mo lona alofa fa’atama, aemaise ai o le fafoi o le viiga i le Atua, i le ola ma le malosi ua foai mo ia.
E pei foi ona masani ai aso faapenei, i le matagofie o le keke na saunia faatasi ai ma moli felanulanuai e faailoga ai lenei aso fiafia ua aulia.
O le afioga i le peresitene o le autalavou, Maelega Tuiono ma le autalavou sa tapenaina fa’afiafiaga mo le aso tuupoina ae na matua sola lava ma le sasa a fanau tupulaga, faatasi ma le pese to’atasi a le susuga ia Maelega e faamanuia ai le aso soifua.
Na alo atu i le taumafataga saunia lelei, tali foi le sua i le aufaigaluega ma le mamalu o le auvalaaulia, ma o le fetalaiga ia Mailata Uiato Fili, sa avea ma fofoga o le aso i le polokalama atoa, ma ua lau i ula, tepa i ula i le matagofie naua o sauniuniga ma tapenaga, sa faapea foi ona alo atu i faaaloaloga aua foi le paia o le aufaigaluega, le auvalaaulia aemaise le matagaluega i Kalaiesetete.
O le fetalaiga ia Tuiatua Moemalo sa lauga faafetai mo le valaaulia ina ua tasi iai le moe, ona taape lea o le fuamanusina alu le gogo ia ma si ana i’a, ua iu manuia le faamoemoe i le faatasi mai o le Atua.
