Ua taunuu i laufanua o Kalaiesetete Sonny B Williams

E tiga le tetele o timuga ma le maatiati o le timu aisa i le Rugby Park i Kalaiesetete i le aoauli o le Aso Faraile talu ai, ae lei faavaivai ai le lolofi atu o le au tusitala, au faasalalau i leitio aemaise faasalalauga i luga o televise i le auaunaga masani o le faatalanoaina o le alii lakapi o Sonny Bill Williams, 25 tausaga lea ua toai taunuu mai ma tulaueleele i le aai o fugalaau mātala e ui ina ova le malulu.

O le taimi muamua lea ua taunuu mai ai Sonny Williams i le mae‘a ai ona sainia lana konekarate i le Iuni Lakapi a Niu Sila mo le 18 masina, lea ua ia filifilia ai le kalapu lakapi a Canterbury mai le ofa miliona o tupe mai le kalapu lakapi i Falani.

I se faatalanoaga ma le sui o le Samoa Times, na ia ta‘ua ai e lē o ia o se alii faipisinisi ia pe tāua ia te ia le lifestyle tamaoaiga o atunuu i fafo, ae o ona moomooga ia foi mai i Niu Sila e finauina ai le taaloga lakapi, atoa ma lana miti e fia pa‘i i le jersey lakapi o le All Blacks, ma taumafai na te ausiaina sona avanoa i totonu o le ‘au faavaomalo a Niu Sila.

Na ia ta‘ua lona filigā e fia taalo faatasi ma tama matutua lauiloa a Canterbury e pei o Carter ma McCaw, o le a tele ni ana lesona e maua mai ai aemaise atonu e vave ai ona oo atu i le isi sitepu o loo ia fia mauaina. Ae e lē faigofie ia te ia auā e fuafua lava i le malosi ma le lelei o le tomai foi i le taaloga e manaomia tele. O loo tamomoe foi o ia ma le taimi a le uati ona o loo ia tilotilo i lona naunautaiga e fia iai i totonu o le aufili a Niu Sila mo le taaloga o le Ipu o le Lalolagi i le tausaga fou, ae ua lē na o ia foi o loo iai lea lagona malosi.

Na fesiligia le la faiga paaga ma Tana Umaga, ma faapea o le a ia taalo mo Counties Manukau ae na ia faaalia, ua mae‘a le la fefaasoa‘iga ma Umaga e ui ina lagona le faanoanoa, ae ua tasi lana filifiliga o le a folau mai i le motu i Saute, ma o se manatu foi ua matuā faafiafiaina ai si ona tina o Lee ina ia toe foi mai lava i Aotearoa e taumafai e taalo mo le All Blacks pe a tusa ai.

Ua ia fiafia tele ua taunuu mai ma feiloai i nisi alo Samoa e pei o Steve Fualau ma Ropati Fruean, ma ia faaalia ai e fiafia lava e faamasani i le mamalu o le atunuu o loo aumau i Kalaiesetete, auā o lona aiga lona lua lea i le motu i Saute.

I sana tala mai i le tusitala, na ia ta‘ua ai le faalevevesi o tusitala a Niu Sila pe a faatusatusa i Ausetalia, ma sa vaaia ona foliga e toafimalie.

O se alo foi o le atunuu e ui ina taugata ae e tamalii tuusa‘o lava lana talanoa i le au tusitala, e ui ina fa itula o faasolo avanoa mo faatalanoaga. I le taimi nei o loo faatali le toe faafoisia atoatoa o lona malosi pe oo atu i le taaloga muamua a Canterbury ma Hawkes Bay i le aso 30 Iulai 2010 i le AMI stadium i Kalaiesetete, ua alaga tatau ona filifilia mo lana uluai taaloga.