Ua tatau ona laa le netipolo a Samoa i se isi laasaga

O se finagalo lea na faaalia e le tamaitai o loo i le tofi Peresitene o le Asosi Netipolo a Samoa, le susuga Noumea Simi i sana lipotia faaletausaga e faatatau i le agai i luma o lenei taaloga i Samoa.

O le tausaga na tea nei na oo atu i le 700 ‘au a alii ma tamaitai na tausinio i Samoa i lenei taaloga, ma ua vaavaai foi le Asosi i nisi tausinioga e unai ai le tomai mai i le fanau laiti i aoga tulagalua agai atu lava i aoga maualuluga lea foi ua amata a latou taamilosaga ma ‘au a kalapu taitasi.

O tausinioga foi nei o loo aofia ai taamilosaga mo Ofisa eseese a le atunuu. O se tasi o galuega tele lava o le sailia lea o seleni ua mafai ai ona faatino polokalame a le Asosi ma na faapea ona faafetaia pea e le tamaitai Peresitene le lagolagosua a pisinisi eseese o loo fesoasoani auā lava le taumafaiga o le taaloga ua toatele ua tausinio ai i lenei vaitaimi.

O se tasi o fesoasoani tele lea na faataunuuina i le amataga o le masina, e pei ona iai se faaaliga o laei o le fale ofu o le MENAS i Samoa. O le tupe na aoina ua faataatia nei mo sauniuniga a tamaitai i tausinioga faavaomalo ma le Ipu o le Lalolagi.

E iai le manaoga o le Asosi ina ia oo atu i le 2015 ua toatele fanau a Samoa i totonu lava o lo tatou atunuu e tausinio ma taaalo i le ‘au tele a Samoa ona o loo toatele lava o fanau mai i fafo ia e fai ma sui o Samoa i taaloga faavaomalo auā e malosi le unai i fafo i le tomai ma le taimi e alu i toleniga ma sauniuniga.

O le mafuaaga lea o le faagasolo malosi o tausinioga i Samoa lava ia, ina ia mautinoa e oo le maualuga o le agavaa o alo o Samoa i Samoa nei lava ia, e tauva ai ma ‘au tetele o lenei taaloga i fafo.

O le tasi lenei o taaloga ua iloga le maualuga ai o le igoa o Samoa i tauvaga faavaomalo ma na manino i le lagolago i le po o le faaaliga lea na fai ai le sailiga tupe a le ‘au, le tele o le lagolago o loo iai mai i le aiga pisinisi i Samoa nei ma atunuu i fafo.

Faaalia e le tamaitai Peresitene ua matua le netipolo i Samoa, ma ua tatau foi la ona laalaa i luma taumafaiga aemaise lava i totonu o Samoa ina ia mafai ai ona faapea, ua fili uma mai lava i Samoa ana teine taaalo.

Ae o le galuega tele lena ua fai nei ina ia malosi le sao o i latou ua tofia e vaaia lenei taaloga ma faatautaia mo le ausia ai o lea foi faamoemoe.

O le tulaga o laufali mai i Samoa ua mafai ona faatautaia taaloga faavaomalo, o le isi lea laasaga tele na vaaia i le tausaga na tea nei, ma ua mafai foi ona fesoasoani laufali o le netipolo a Samoa i le faatautaiga o taaloga a le motu o Tokelau lea na faatautaia i le tausaga na tea nei a latou taamilosaga.

I taimi o taaloga faavaomalo na ta‘ua ai e le Asosi o loo galulue ina ia maua le to‘a, maua le tomai o tamaitai taaalo e tali ai soo se ituaiga luitau e feagai ma i latou i totonu ma fafo o le malae, ae ia taulai ai mo le faatinoga o taaloga, ma o nei manaoga uma ua galulue ai nei le Asosi i le toe amata ai o le taamilosaga a le atunuu i le netipolo.