Ne‘i alu uma o tatou mafaufau i le tele o nei mau vevesi ua tulai mai faafuasei i nai uso tuaoi i Kalaiesetete, ae galo ai foi le isi o tatou tiute tāua e tatau ona faataunuu mo lo tatou atunuu.
Mo le silafia e i latou uma na lesitala o latou suafa mo le itumalo faapalota a Botany, o lenei ua savali le lua vaiaso talu ona tatala le faatinoga o palota mo lea itumalo.
O le Aso Lulu, aso 16 Fepuari 2011 lea na amata ai ona tatala fale palota e 4, ina ia mafai e i latou e fia vave fai a latou palota, ona agai atu loa i ai mo lea faamoemoe, pe afai e lē mafai ona auai i le aso tonu o le faiga palota, le Aso Toonai, aso 5 Mati.
E tāua tele lenei fuafuaga mo palota e vave fai (advance voting) mo faiga palota laiti nei. Talu ai e na o totonu lava o le faaitu o Botany e mafai ona maua i ai fale palota mo palota e vave fai, e leai ni fale palota i tua atu, e pei ona masani ai i le taimi o le faiga palota tele a le atunuu.
Lona uiga e lē gata ia i latou e lē avanoa i le aso 5 o Mati, pe faafuasei foi ona aafia i se tuatuagia lē maalofia, ae mo i latou foi o loo nonofo mamao ese mai Botany ae o loo lesitala ai iinā. O le taimi lenei mo i latou e faatino ai lea palota e vave fai.
O nofoaga o fale palota mo palota e vave fai:
• Beauty Place, 309 Botany Road, Botany
• Botany Library, Botany Town Centre, 1 Sunset Terrace, Botany
• Meadowlands Methodist Community Church, 128 Whitford Road, Mealowlands
• Tupu Youth Library, 102R Dawson Road, Flat Bush
I se faatalanoaga ma le afioga i le alii faipule o Magele, le Afioga Su‘a William Sio, na ia ta‘ua ai, ona o le tau leai o nisi o faaaogāina lenei auaunaga mo palota e vave fai, ua toe tapunia ai le fale palota lea sa faatulaga i le Tupu Youth Library, 102R Dawson Road, i Flat Bush.
Saunoa foi Su‘a, o lea ua mafai foi ona palota mai i latou o loo i atunuu mamao talu mai le aso 16 o Fepuari. E lē gata i nofoaga ua faapitoa mo nei palota e vave fai, ae mafai foi e nisi e faigofie mo latou ona oo atu i ofisa o soo se Lesitala o Faiga Palota i soo se vaega o le atunuu ona faataunuu mai ai iinā a latou palota.
O se tasi o auala sili ona faigofie mo tagata i atunuu i fafo e palota mai ai, pe a agai i le upega o fesootaiga mo faiga palota: www.elections.org.nz ona maua ai lea o le pepa e faatumu ai le latou palota, ma toe lafo mai i le fax poo le pusa meli foi, ina ia mafai ona maua e le ofisa o faiga palota, i le aso tonu o lenei faamoemoe tāua o le atunuu.
O tagata o loo i atunuu mamao, afai e lē mafai ona maua le itulau o le initaneti, e mafai ona latou talosagaina se pepa palota e lafo atu, ona faatumu lea ma faafoi ane i ofisa e pei ona faatulaga i Ausetalia, Saina, Egelani, Hong Kong, Samoa ma le Atu Kuki.
O le manaoga autū mo lenei faiga, ina ia aua ne‘i misia le avanoa o soo se tagata palota e fai ai lana filifiliga, mo le faiga palota laititi lenei a le itumalo o Botany.
